ЧеалкIуси наслулизи вегIла улкала ва лебилра дунъяла тарихличила баянти гIяхIил руркъяхъни дебали мягIничебси баркьуди саби. Ил секIайчи халаси пикри бяхIчииули саби Дахадаевла районна багьудила учреждениебазиб.
Дигеси саби бучIантани декIар-декIарти олимпиадабачир ва далдуцуначир гьаларти мерани дурцнира. Гьалабван Дагъистан Республикала школабазиб бучIути чедирти классунала дурхIнани лебил Россияла тарихла олимпиадала регионнаси этаплизир жигарла бутIакьяндеш дариб.
ГIядатли биубливан, ил балбуц гьар дуслизиб Дагъиста пачалихъла педагогикала институтлизиб (ДГПИ) дурабуркIуси саби. Илкьяйдали жагьил бучIантас имканбикIули саби чула дагьрира устадешра чедаахъес.
Республикала декIар-декIарти муниципалитетуназибадти чедирти классунала бучIанти ил балбуцла дазурбазиб абзлизи каберхуртири. Тарихла шайчир анцIбукьуначила илдани теорияла ва практикала бетуцлизир чула мурхьти багьудлумира гIяхIти устадешра чедиахъутири.
Олимпиадала баянти хIясибли, якьинбиуб Дахадаевла районна ГIяхIмадхан Абу-Бакарла уличилси дахъал шалубарси лицейла 11 ибил классла учIан ХIяжимурад Рабаданов гьабкьятала къяйлизи дуравхъни. Абзла башрилизир илини сунела тарихлашалти гIяхIти багьудлуми чедаахъиб.
Илдигъунти далдуцуни кумекли детарули сари школабазир дагьрилашалти бетуцуни ункъдирахънилис ва дурхIнала багьудлумала даража ахъбурцнилис. Илкьяйдали жагьилти сагати багьудлумачи гьирбирули саби ва гIякьлу-дагьрила шайчирти абзаназир бутIакьяндеш дирес къайгъилизи биркули саби.
Муниципалитетла багьудила учреждениебала бучIантани лебил Россияла тарихла шайчибси олимпиадала регионна этаплизир бутIакьяндеш дарили, илар мурхьти багьудлуми чедаахъни гIячихъси мисал саби жагьси наслула багьуди кайснила ва гIилмула хIялумцIлаби дурадуркIнила бетуцлизир черяхIти сархибдешуни диахъес имканти лернила.
ХIяжимурад, илала бегIти ва уршила насихIятчи З.Умматова илгъуна сархибдешличил бархбасахъи, мубаракбарес лайикьли саби. Багьудлумала ахъанайтачир гIуррара илини гьачамцун ахIи, нуша разидирахъниличи вирхес вирар.
Дахадаевла районна администрацияра пресс-служба
