ВиштIахIейчивадли ил хьуликIусири ванза буза­хъес или. 1959 ибил дус­лизиб Къарабудагъкентла район­на Губданила школализиб ункъли бел­чIу­­ди хъараахъурли гIергъи, Буйнакъскла ко­опе­­ративное училищелизи керхурсири ил.
1961 ибил дуслизиб илра ункъли хъараахъур. Илини бузерила цаибти гунзри кацIибтири Ленинский райпотребсоюзла бекI бухгалтерла заместительли узули. Амма ванзаличирти дигили ил 1962 ибил дуслизив К.Тимирязевла ули­­чил­си Москвала шила хо­зяйствола ака­де­мия­лизи киб. Экономикала ва шила хозяйство бу­захънила факультетлизи учIес керхурсири илав.
1967 ибил дуслизиб илабра ункъли белчIуди хъараахъурли, ГIябдулбари Ибрагьимовли гIялим-экономистла санигIят касиб. Дагъистайзи чарухъи, илини сунела мурхьти багьудлуми дигуси санигIятлис харждарес кьасбариб. ДАССР-ла шила хозяйствола Министерстволи ил 1967 ибил дусла июньничив Чириюртла машино-животноводческая станцияла бекI агрономли узахъес вархьибсири. Ил дусла сентябрьличив биалли, СССР-ла шила хозяйствола Министерствола ХIукму хIясибли, Къизларла районна биринж дашахъуси халаси «Рассвет» совхозла бекI агрономли узахъес шурватурсири. 1974 ибил дусличи бикайчи илав узули калунсири. Бузерила цаибти бурхIначивадал ил сагати технологияби пайдаладирули, чекайзурли узухIели, совхозли 2200 гектарличирадли 42,5 центнер ца гектарличи хIясибли биринж дучибтири ва Дагъистайзиб совхозли цаибил мер сархибсири. Илис гьалар илар сархути биринж гIяхIцадла камтири.
Агропромышленный комплекслизир сар­хиб­дешуни дирахъули, узуси жагьил специалистла чедибдешуни пикрилизи касили, 1974 ибил дусла мартличив ил КПСС-ла обкомла бюрола хIукму хIясибли, «Октябрьлис 20 дус» ибси гIелакабулхъуси совхозла директорли узахъес Хасавюртла районнизи вархьибсири. ГIяб­дулбари Ибрагьимовли Костекла ванзаличирра биринжла гIяхIти са­бухъу­ни сархес вирни якьинбарес дигулри халкьлис, хаслира жа­гьил­тас.
Гьачам яргаличилси собрание дура­бур­кIу­хIе­ли, жагьси директорли биринжла сабухъуни им­цIа­ди­ахъалли, совхозлис сегъуна пайда бирарал баянти гьаладихьибтири. ЦацабехIтас гьа­­ла-гьала гьанбиркусири илини дурути гIям­ру­лизир пайдаладарести ахIен или. Илини дурибти «хъуммартидая, юлдашуни, хозяйствола челябкьла – биринж дашахънилизиб саби» ибти гъай машгьурдиубтили детауртири. Илкьяйдали бегI гьалаб сагати технологиябира пайдаладарили, устадешчебти механизатортази ванза хIядурбарахъес хъарбарибсири илини. Иличирли биринжла гIяхIти сабухъунира сархибтири. Гьар гектарличирад 19-личирадли 30-йчи даайчи центнерти сархескабиибтири. ГIебшнила дегIнуби 17-личирадли 38-личи бикайчи гьар гектарличирадли сархескабииб. 1620 литрличирадли 3300 литрличи бикайчи ниъ имцIадиахъубтири ва районнизиб ил шайчибра цаибил мер буцибсири совхозли.
Ризкьила сабухъуни имцIадиубхIели, мицIираг да­хъ­да­ахъесра имканти акIубтири. Илкьяйдали сов­хозла хIян­чи­зар­тала багьудлуми чеункъдиахъести тя­хIур­тира даргиб­ти­ри.
Биринж сархнила шайчир дахъал чедибдешуни диахъубхIели, ГIябдулбари Ибрагьимов кIел Бузерила ХIунтIена Байрахъла орденничил шабагъатлаварибсири. Илини мурталра жагьилтази бурусири, вегI акIубси ванзаличи диги хIедиалли, шила хозяйствола гIяхIси специалист ветаэс хIейрар или.
Ил КПСС-ла Хасавюртла РК-ла бюрола ва райисполкомла членни, Хасавюртла райсоветла халкьла депутатли кIина викIибсири.
ГIябдулбари Ибрагьимовли гьарил секIал чебета­ахъи­ли ва къалабахIейкIули, бирусири. Камси се­кIалра пикрила дураб балтуси ахIенри ва илра ункъли гьунчибиркахъусири.
«Октябрьлис 20 дус» совхозла директорли узу­хIе­ли, заочно аспирантурализира керхурсири ва Кос­тек­ла ванзаличир биринж дашахънила шайчир хIя­лумцI­лаби дурадеркIибтири.
Илдигъунти къайгънала гIяхIдеш­ли­чибли 1979 ибил дуслизиб илис им­канбакIибсири биринжла сагаси сорт акIа­хъес ва темала чебкад Тимирязевла ши­ла хозяйствола академиялизиб кандидатла диссертация защититьбарибсири.
Гьар дуслизир хозяйстволизир сабухъуни им­цIа­дикIутири ва халкьра чедибдешуначи бирхули, ибкьси бузерилизи ихъутири.
1984 ибил дуслизив ГIябдулбари Ибра­гьи­мовличи ит манзиллизиб гIелака­булхъуси Ленинский районна «Губден» совхозла директорла къуллукъуни хъардарибтири. Илав 6 дус узули калунсири.
Ил узути дусмазиб совхоз гIяхIцадла гьа­ла­бяхI арбякьунсири. Ленинский райсоветла де­путатлира калунсири. Чинав узули виаллира, илини адамти гIеб­бурцутири ва илдала яшавлашалти бетуцуни къулайдирахъутири.
Ил узуси манзиллизир Губданила шилизир 960 мер­личилси урга даражала школалис ва почталис юр­тани тIашдатуртири. Сирагьила шилизибра 200 мер­­личилси урга даражала школалис юрт тIаш­ба­тур­сири. Жанга ва Ленинкет шимазир школаби лутIи-хьулчилизирадал сагадарибтири, Сирагьила, Жангала ва Ленинкентла шимази газ букибсири.
1991-1994-ибти къиянти дусмазив ил узули калунсири Ленинский районнизив шила хозяйствола продукция исни-дирцнила шайчивси пачалихъла бекIливиубси инспекторли. Авал дус районна шила хозяйствола управлениела начальникла заместительли ва 10 дус районна шила хозяйствола управлениела начальникли узусири 2004-ибил дуслизив пенсияличи укьяй­чи.
2009-2021-ибти дусмазив Дагъиста пачалихъла халкь­ла хозяйствола университетла «Землеустройство и зе­мель­ный кадастр» ибси кафедрала доцентли калунси сай.
ГIябдулбари Ибрагьимовла гIибратчебси бу­зери улкалира ахъли кьиматлабарибсири ва, гьалабра гьанбушиливан, кIел Бузерила ХIун­тIена Байрахъла орденничил, «ВегIла ван­за­личи диги лерни багьандан» ибси ДР-ла ХIурматла лишанничил, ДАССР-ла Верховный Советла ХIурматла Грамоталичил, РСФСР-ла «Урожай» ДСО-ла ХIурматла Грамоталичил шабагъатлаварибсири. Ил ДР-ла шила хозяйствола хIурматла уличи, РСФСР-ла халкьла багьудила отличникла уличи лайикьикибсири. ГI.Ибрагьимов бузерила ветеран ва шила хозяйствола гIилмуртала кандидат сай.
Шила хозяйствола университетлизив узу­хIе­ли, илини «Экономика управление АПК», «Учет земель и контроль их использования», «Прог­нозирования использования земельных ресурсов», «Планирования населённых мест», «Экономика и организация сельскохозяйственного производства» ибти предметуни кадирхьутири. Илди предметуни хIясибли студентунас пособиебира хIядурдарибтири. Илини гIилмула 40 хIянчи делкIунтири ва илдазирадли 23 статья Ваковла журналлизи кадяхъибтири. 2019 ибил дусла июньничиб илис доцентла у бедибсири.
Университетлизив узухIели илини мурталра гIил­мула конференциябазир бутIакьяндеш дирутири ва гIил­мулизиб бузахъес багьандан студентуни хIя­дур­би­­рутири. Университетла далдуцуназир бу­тIа­кьяндеш дирухIели гьаларти мерани дурцутири ва ХIурматла Грамотабачил шабагъатлавирусири.
Дусми ардашуцад ил пагьмучевси дубурланна хIур­мат-кьиматра ахъдикIули сари. Илини буру­ли вирар вегIлис зарал хIебиахъубли ва замана харж­хIе­ба­рили, цар­хIиллис гIяхI­деш барес хIейрар или. ГIе, вегIра гьарли-марси ду­бурланнизи халварес хIейраргу цар­хIил­тас гIяхI­­дешуни хIедиралли. Нуни жагьилти гIеб­бур­цули, ил­­ди бархьси гьунчи бяхI­б­ир­ни­лизибра дила му­гIял­лим­та­ла ва на­си­хIят­чибала халаси кьадри лебси саби. Илдани сай­ра нура гIяхIбаркьуначи вяркъурси.
Иш белкI нуни дила узи октябрьла 29-личив 82 дус виъниличил бархбасахъи, белкIунси саби ва ил илгъуна разиси анцIбукьличил уркIи-уркIилавадли мубаракирулра. Илис ва илала гъамти-тухумтас чархла арадеш, бекIла чедиб даршуси зак, гIямрулизир гьарбизунира баракатра диубли дигулра.