…Ургуба жагабарили бирар гьар журала духълумани, илдачир дакIибти вавнани, бицIили бирар нигIматунани. Селичибалра жагаси ургубалаб — ил саби анкIила луги,--гIямрула хьулчи, Адам Идбагли бегI гьалар дегIунти анкIила кьукьри дуили кьалли!
АнкIила лугиличил мешудуцесли сари нешла мезра, адам дунъяличи дакIувиубхIели дегI гьалар далути дугьби нешла мезла сархIели. Нешла мезличил дурабулхъухIейчирад 105 дус дикибси ва даргантала шими-махьурбази биуси газетала кьадрира, дила пикрили, нушала гIямрулизир лерти цархIилти анцIбукьуни хIясибли чихъли, чебяхIли чебиэс гIягIнили саби, сенахIенну илини халкьличи, даргантачи лебхули саби се лебли биалра гIямрулизиб гIяхIсира, жагасира, гьабкьясира.
Илгъуна кьиматли иргъахъуси ахIен биалра, масала, радиола, телевидениела, жузала, журналтала, театрла кьадри газеталайчиб камси саби ибси, ургубалаб бакIибси гьарил сабухъла кьадри халаси сабли хьалли, анкIила лугналайчи, чузибадра кьацI бирути, — абикахъес дирехIев, гьатIи!
Даршлим шел дус — халаси манзил саби, илди дусмазир диубти гIяхIтира вайтира анцIбукьунала бикьрили бетаурси республикала даргала газеталис гьаннала гIергъира гIямрулизиб «ГIяхIси сягIят биаб!» — или дикIес чебси саби нушачиб.
…Республикала даргала газетала редакциялизир ну рузес рехIрихьибсири 1982 ибил дуслизир. ИтхIели илис «Ленинна байрахъ» бикIусири ва редакциялизиб «Собкор» бикIуси къуллукъ бири — «Собственный корреспондент». Илдани чула районнизиб хIербирули, газетализи белкIани дурхьес бирутири, редакцияли хъарбарибси план хIясибли. Нуни белкIани хIядурдирутири Ахъушала ва Лавашала районтазирад.
Дила уркIилизиб халаси разидеш калунси саби дарганти-ургаб бегIлара хIурматла, пагьмучебти, къугъати адамдешличил гIямру деркIибтала лугIилизибадти хIябал гIяхIгъабзани бекIдеш дируси къушумлизир 21 дус рузес имканбакIниличи. Илди сабри ГIяхIмадхан Абу-Бакар, ГIябдуллагь ВяхIидов ва ГъазимяхIяммад Юсупов, хIяб нурли шалабараб чула, жявли арбякьун гIямрулизибад!
ХIябалра илдазивад газетала редакторла къуллукъличив имцIали узули калунси ГъазимяхIяммад Юсупов сайри. Ил газетала бекI редакторла къуллукъличи вакIибсири къиянси 1993 ибил дусла ахирлизив. Улкала бухIнаб бархибдеш сабри, учительтала, цархIилти хIянчизартала бузрадли алапа, пенсия лугули ахIенри, дурхIнас кабизахъурси пособие ца дус хIегили кавлулри.
«Замана» газетала редакциялизиб биалли базла бухIнаб кIина, цалра бархIи кьанхIебиахъубли, 5-ибил ва 20-ибил бурхIназиб алапа лугусири.Бири гIяхIси гонорарра. Наб гьанбиркули бирар къиянти 90 ибти дусмазиб дурхIни гушхIебиахъубли бихIес ну бажардихIериркаси «Замана» газетала редакциялизиб хIянчи хIебиубси биалри или.
Республикала дарган мезла газета 80 дус биънила хIурматлис хIянчизартас гIяхIти савгъатуни, чумал адамлис, илдала лугIилизир набра «ДР-ла культурала урибси хIянчизар» ибси у гибсири, сунечиблира алапа 20 процентла имцIабиубси.
ИтхIели редактор ГъазимяхIяммад сайри, ва сунени цархIилтас барибси гIяхIдеш даимкабиубли, сай агарвиубли гIергъира сунела садакьа буртIули лебсиван билзули бирар!
Гьанбиркур редакциялизиб бузути цархIилтира гIяхIти адамти:Запир Харбилов, ГIиса ТIагьиров, Ильяс ХIусейнов, корректор, ХIямшимала шилизирадси Калимат ГIяхIмадова, Бутрила шилизибадти кIел рузи — ПатIимат ва Рукьият, — илди машинисткаби сабри, бунагь-хатIа урдуцаб чула!
…Цабалгунси къушум леб «Замана» газетала редакциялизиб ишбархIира — редакторла къуллукъуни дузахъуси жагьил адам Рабадан БяхIяммадовлис ва илала бекIдешлиуб бузути пагьмучебти рурсбас – Салимат ГIялиевас, ПатIимат Кьурбановас, Муъминат Хаттаевас, Наида Гъуруевас, ПатIимат Сулайбановас, Калимат ГIябдуллаевас, къантIли буралли, лебтасалра диаб гIяхIси арадешра, хIянчилизир сархибдешунира, илар рузухIели дилаван гьарилла уркIилизиб разидешра биаб!
ДекIарли чумал дев дурес дигулра ХIяжимурад Ражабовлис, — нуни имцIаливан дучIути илала белкIани сари. Бархьли бурасли, мурул адамли белкIунси белчIес имцIали дигахъис, сенахIенну мурул адамла белкIлизир имцIати, дахъал гъай хIедирар. Шагьарла духIнарти далагарти анцIбукьуначилара лукIули вирар илини. ГIяхIбилзули саби сунела пикри бурухIели кьяркьти, чурхти дугьби пайдалахIедарили, хIякимтачибси гIяйиб кагибти, хIялимти гъайличил, урус викIуливан, «в деликатной форме» иргъахъули лукIни.
ГъазимяхIяммадли собкортачи хъарбирули вири: «ХIушани алавчарти гIямрулизирти нукьсандешуначила лукIеная, амма децIхIегесли, гьимхIебукIесли, газеталичи къаршидеш хIебуцесли хIякимтачибси гIяйиб бурес баленая!» Дила пикрили, илкьяйда лукIули сай ХIяжимурад, ва гIурра дахъал делкIахъес Кьудратла ВегIли сунес ахъри бедаб!
…Даршлим шел дус биуб даргала газета, нешла мезла байрахъчи, бархьдешлис, хIялалдешлис къуллукъчи, миллатла пагьмуртас далайчи. Газета хIядурбирутазибад гьариллис диаб дахъал дусмала ара-сагъти гIямру, ургубалар лугниван берхъаб чула насабра!