Дагъистан Республикала пачалихъла ва жа­ми­гIятла хIяракатчи, Кьункьила шилизивадси цаибси гIялим Кьурбанов МяхIяммад Рабазанович сентябрьла 28-личив гIямрулизивад шалгIевухъун.
МяхIяммад Рабазанович акIубсири 1935 ибил дусла декабрьла 19-личив Дахадаевла районна Кьункьила шилизив. Илала дудеш Кьурбан Рабазанов (Кьади-Кьурбан) 20-ибил даршдусла бехIбихьудлизив Да­гъистайзир хабардерхурси динна гIялим вирусири. ГIур Совет хIукумат кабилзахънилизир ва колхозуни ал­кIахънилизир илини жигарла бутIакьяндеш дарибтири. Неш ПатIима Кьурбанова колхозла хIянчизар рири.
М.Кьурбанов 1941-1949-ибти дусмазив районна декIар-декIарти школабазив учIули калунсири. 1952-1954-ибти дусмазир Дахадаевла районна ВЛКСМ-ла РК-ла секретарьла къуллукъуни дузахъули калун. 1954-1957-ибти дусмазиб ВатIа гьалабси чебла ахъибсири, гIярмияла къяяназиб къуллукъбирули. 1956 ибил дуслизиб Венгриялизир кадикибти дявила анцIбукьуназир бутIакьяндеш дарибтири. ГIярмия ахъили чарухъунхIели, ДГУ-ла филологияла факультетлизи керхурсири. ЧебяхIси даражала багьудиличил вегIиубли, ДугIахъарла школализир бузерила цаибти гунзри кацIибтири.
1967-1970-ибти дусмазиб Москвализиб аспирантура таманбариб ва, диссертация кабизахъурли гIергъи, Дагъиста медицинала институтлизи узахъес вархьибсири. Илав философияла кафедрализив халасигъуна преподавательли узули хIябал дус узули калунсири.
1992 ибил дуслизиб ДР-ла дурарти бархбасунала, багьахънибала ва миллатла политикала шайчивси министрла заместительла къуллукъ бузахъес вехIихьибсири. 1999 ибил дуслизив «Народы Дагестана» бикIуси жамигIятла-политикала журналла бекI редакторли узес вехIихьибсири ва 2020-ибил дусличи бикайчи хIянчи барибсири.
Кьункьила шилизивад дураухъунси ва гIяхIцад кьункьантас гIилмулизи гьуни абхьибси цаибси гIялим сайри МяхIяммад Рабазанович. Ил динна, тарихла, философияла масъултала черкадти гIилмула хIянчурбала авторра сай.
М.Кьурбановли илкьяйдали жамигIятла гIямрулизирра жигарла бутIакьяндеш дирутири: ил ДР-ла адамла ихтиюртала шайчибси Правительствола Комиссиялизи, бузерила ва дявила ветерантала Советла президиумлизи, «Гьанбикунала жуз» редколлегиялизи, Дагъистан Республикала БекIла гьалабси халатала Советлизи, Россияла журналистунала Союзлизи, лебил Россияла халкьла фронтла регионнизибси штаблизи керхурсири, Венгриялизир кадикибти дявила анцIбукьунала ветерантала Советла председательли вирусири.
ЖамигIятла гьалар диахъубти сархибдешуни багьандан МяхIяммад Рабазанович пачалихъла, республикала ва ведомствобала шабагъатуначи лайикьикибсири. Илди сари – Гьалмагъдешла орден, «Долг и честь» орден, ДАССР-ла Верховный Советла Президиумла, ДР-ла Пачалихъла Советла, КПСС-ла Обкомла ХIурматла Грамотаби, «1941-1945-ибти дусмазиб кабикибси ЧебяхIси ВатIа дергълизиб Чедибдеш сархибхIейчирад 60 дус» ва ««1941-1945-ибти дусмазиб кабикибси ЧебяхIси ВатIа дергълизиб Чедибдеш сархибхIейчирад 70 дус» медальти ва цархIилтира. Дявила ва бузерила ветеран, Дагъистан Республикала пачалихъла къуллукъла урибси хIянчизар.
МяхIяммад Кьурбанов чинав узалра жавабкардеш дихес балниличивли, мурадуначи виъниличивли, бархьдеш гIеббурцниличивли, сунечи хъарти ункъли тамандирниличивли цархIилтазивад декIарулхъусири.
МяхIяммад Рабазанович хъалибаргла гIяхIси бекIра вири. Илала хьунул ПатIимат ХIяжиева пенсияличи араайчи Кьункьила школализир мугIяллимли рузусири. МяхIяммадли ва ПатIиматли дубурлантала гIяхIти гIядатуни хIясибли урегал дурхIя абикьур ва гIямрула бягIуси гьунчи дураиб: Гьарун («Дагъистан» РГВК-ла цаибил директор, ДР-ла дурарти бархбасунала, багьахънибала ва миллатла политикала шайчивси министр, ДР-ла Президентла пресс-службала ва багьахънибала политикала Управлениела начальник. 2011 ибил дуслизив къачагъунала някъбазивад алхун), Нуруллагь, Жаруллагь, Гьадият, Субайбат ва Сангарат.