1961 ибил дусла сентябрьла 11. Избербаш шагьарлизиб пардав гьаргбирули саби. Даргантала тарихлизиб гьалаб камли къаршибиркуси анцIбукь саби сценаличи жагьилти гIяртистуни дурабулхъни. Илди Еревенна художественно-театральный институтла даргала миллатла студияла цаибти выпускникуни саби. Илди хIербикIутачил дарган мезли гъайбикIули саби. ГIяр­тис­тунани даргала машгьурти писательти ГI. Абу-Ба­карли ва Р. Рашидовли шурдатурти Шекспирла «Отелло», Лермонтовла «Бэла», Мольерла «Скапенна шикьатIала» дарган мезличил зайдухъахъун. ИтхIелла прессали лукIулри: «Дагъистан Республикализиб даргала халкьла сагаси театр алкIнила бикьрили детаурра. Ил нушала республикала культурализиб халаси байрам саби».
ХIера, итхIейчирад 65 дус дикиб. Дунъяличиб цайли цаси дарган мезличил гъайбикIуси театр сунела 65 эсти гIебшнилис разили гьунибаиб. Илди дусмала бухIнаб театрлизир даршличирра имцIали спектакль гьаладихьиб, миллатла хIябал студияла выпускникуни абикьур, театрла гIяртистунани Россияла ва халкьани-ургарти гIяхIцад фестивальтачир бутIакьяндеш дариб. Театрли гIяхIцад къияндешуни дяхIяур ва сагали бузес бехIбихьиб.
Даргала сагаси театрлис чидил хIурматла адамла у бедес вирара ибси суал ахъбуцибхIели, ХIурхъила шилизивадси ГI. Батирайла уличиб тIашбизур. СенахIенну ил даргала литературалис, хаслира поэзиялис хьулчи кабихьибси сайхIели.
Батирайла далуйти авал, яра гехIел тугъла сари. Илди илини чугур бяхъили, шадлихъуначир, адамла вайти къиликъуни далтIули, дучIутири. Батирай мицIирли левай, илала назмурти чинаралра делкIунти ахIенри, амма илди халкьла уркIбазир даимлис мицIирли ва зайдикIули сари. Батирайла назмуртала цаибил сборник 1928 ибил дуслизиб дураибсири. 1935 ибил дуслизир илала назмурти Дагъиста тилмаж, поэт, писатель, литературовед Э.Къапиевли шурдатурли, «Известия» газетализир урус мезличил бегI гьалар дураибтири.
Даргала театрла тарих Арменияличил цIацIали бархбасунси саби. 1955 ибил дуслизиб Ереванна художественно-театральный институтли Армянская ССР-ла халкьла гIяртист, режиссёр ва театральный педагог В. Т. Вартанянна бекIдешлиуб МяхIячкъалализиб чула институтлизи адамти кьабулбирни акIахъуб. Ила жагьти уршби ва рурсби кьабулбариб, сабира Ереваннизиб бегI гьалаб театрла искусстволичил тянишбиубти.
Шел дус тIашбизагарси бузерила, Арменияла тах шагьарлизир деркIибти дусмала, умцIни ва чедибикнила кумекличибли – 1961 ибил дусла сентябрьла 11-личиб Па­чалихъла даргала драмала театр акIахъубсири, Ере­ванна театральный институтла 15 выпускник ил театр­ла цаибти гIяртистуни бетаур. Ил театрлизир бегI гьалар спектакльти хIядурдарили гьаладихьибси чедив гьа­нушибси режиссёр-постановщик ва профес­сор Вар­танянин сайри. «Дагъиста бархьдеш» газетали 1961 ибил дусла январьла 12-личиб дураибси но­мерлизиб белкIири: «Осе­тиялан Н.ГIялибековани урус­ла клас­сикла произведение театрлис хIя­дур­ба­риб­­сири, В.Вартанянни спектакль гьалабихьибсири, дар­гала гIяртистунани ил чебаахъибсири. Урусла клас­­сикла произведение ункъли дарган мезличил зай­­бухъун».
Цаибил выпуск дураили шел дус дикили гIергъи 1965 ибил дуслизиб, Ереванна театральный институтлизиб 12 уршби-рурсбазибад цалабикибси, даргала халкьла кIиибил студия профессор А.Г.Кочерянна бекI­дешлиуб хIядур­барибсири. КIиибил студияла дипломныйти спек­такльтили диуб: А.Островс­кий­ла «ГIяйибагарти гIяйибла бегIти», Ж-Б Мольерла «Гуждан дяхънуша ветаурси», А.Ширванзадела «ГьимдукIибти рухI». 1969 ибил дуслизиб кIиибил выпуск дураибсири. Ил студия дуракаили гIергъи даргала халкьла рухIлашалси культура сагадан акIубсири ва сценаличиб патриотизмала тема ахъбуцибсири, бегI гьалар Дагъиста халкьла поэт С.Рабадановла «Багъатирла ГIя­либег» ва «ГIямрула гIянд» спектакльтазир чедаахъиб.
ХIябэсил студия Ленинградла театр­ла, музыкала ва кинематогра­фияла институтлизиб СССР-ла урибси искусствола хIяракатчи, профессор, А.И.Кацманна бекIдешлиуб акIа­хъубсири. Ил студияла спектакльти — Д.Стейнбекла «Адамти ва вацни», Э.Золя «Рабурденна наслу», А.Вампиловла «КIел масхара» — халаси разидешличил ва сархибдешличил илди белчIудила театрла Ленинград, Будапешт, МяхIячкъала, Избербашлизир детерхур. 70 ибти дусмазир ил студияли Даргала театрлис сагаси творческий тимхъ гибсири.
Театр абхьибси манзил, даргала драматургия илцад халаси аги. Лертира Рабадан Нуровла «Зулму», «Пужиуб шайх» ва ГI.Абу-Бакарла «Варгьичебти адамти» ахIенти пьесаби аги. Миллатла драматургия агарли миллатла театрра биэс хIебирар – ил анцIбукьли театрла къиянти цаибти дусми чедиахъулри. Жагьти гIяртистуни миллатла драматургия акIахъес кумекличил даргала машгьурти поэтуни-писательтачи дугьа­бизуртири. Ил жи аргъиб­сири.
КIиибил дус театрлизир даргала ва Дагъиста пи­сательти-поэтунани делкIунти пьесаби хIясибли кадихьибти спектакльти дагьардиуб. Илди сарри: ГI.Абу-Бакарла «Селичиб дунъя тIашси», А.Кьур­бановла «Кайтмасла мекъ», Р.ХIям­затовла «Дубурлан рурси», М.ЯхIъяевла «ХIу дила дилацунри». ГIур чула творчество Даргала театр­личил бигьун З.Зулпукьаровли «ЧIа­кала уркIи», Х.Арсланбековли «Вер­шала неш», С.Рабадановли «Би­риз ва гIиниз» ва «Мерсдакьни», Р.ГIя­ма­ровли «Дубурла вава», «Чинара дила неш», М.ХIямидовли «Ит гьарахъси хIеб» ва ц.
Гьар сагаси студия лябкьухIели, гIяр­тистунала ус­тадеш ва мягIналашал мурхьти спектакльти имцIа­ди­кIулри. «Багъатирла ГIя­либег» спектакль ХI.ЦIа­дасала республикала премияличи лайикьбикиб. РСФСР-ла культурала Министерствола 2-ибил даражала дипломличи «Мерсдакьни» спектакль лайикьбикибсири.
1986 ибил дуслизиб театрла жаняхI сагабирнила хIянчурби дехI­ди­хьибтири, ва ил Избербаш ша­гьар­ла Культурала жаняхIлизиб абхьибсири.
2002-ибил дуслизиб сагабарибси театр абхьибсири. Амма шел дус дикили гIергъи 2007-ибил дуслис шагьарлизибси цайли цаси театр цIали бигубсири. Ца-чумал масъала багьандан, театр сагабирнила хIянчурби вецIал дуслис гIеркъадитIун. Лерилра вайти анцIбукьуначи хIерхIеили, театрли сунела бузери даимбариб. Балкьаахъурси кьисла устала цехлизир спектакльти чедиахъес бехIбихьиб. ХIера, илдигъунти анцIбукьуназир чедаахъибтири гIергъити спектакльти: Х.Арсланбековла «Вершала неш», З.Атаевала «Васият», Г.Хугаевла «ЦIу­дара варгьи», Г.фон Клейстла «Бя­чунси хъаба», Р.Нуровла «Зулму», Р.Хубецовола «Нешла уркIи», Р.ХIямзатовла «Дила Дагъистан» ва ц.
«Культура малой родины» проектла кумекличил 2017 ибил дус­лизир дикибти арцлис хIянчи даим­дариб. 2019 ибил дусла февральла 27-личиб сагабарибси театр хIяйнайс абхьиб. Амма тамашалисван, театр абхьнира ва Россиялизиб 2019 ибил дус театртала дусли ка­би­захънира дархьдизур.
2000-ибти дусмала бехI­би­хьуд­­лизиб театрла гIямрулизиб сагаси бу­тIа (этап) бехIбихьиб. Ил бу­тIа­ли­­­зиб черикIла фестивальтачир бу­­­­­­тIакьяндеш дирес бехIбихьиб. Санкт-Петербурглизиб бетурхуси дурхI­­­нас ва гIулухъабас хасбарибси ле­бил Россияла «Арлекин», Владикавказлизиб бетерхурси халкьани-ургабси «Дазурби агарси сцена», Но­вокуйбышевсклизиб бетерхурси «По Мост», Россия ва Мордовия ца­диуб­хIейчирадал 1000 дус дикнилис багъишлабарибси Сарансклизиб бе­терхурси «Штатлол», Астраханьни­зиб бетерхурси «Вирхулра» ва цар­хIил­тира фестивальтачир бутIа­кьян­деш дариб ва жура-журала шабагъатуначи лайикьбикиб.
Гьаннара Даргала театрла ре­пер­туар имцIабикIули саби ва са­га­­бикIули саби. БегIла гIергъи ка­­­дихьибти спектакльтазирад: Р.Илья­­­совли Дагъиста халкьла писатель Мя­хIяммад-Расулла «БекI­­бяхъ» повесть хIясибли каби­хьиб­си, ва ил акIубхIейчирадал 90 дус дикнилис багъишлабарибси «Дар­­ма­нагар изала», РФ-ла урибси гIяр­тист Т.Сабановли Осетияла ли­­­те­ра­туралис хьулчи кабихьибси К.Хе­та­гу­ровла поэма хIясибли кабихьиб­си «Фатима», Дагъиста халкьла гIяртист М.Сур­хатиловли Дагъиста халкьла пи­сатель Г.Къо­нокъбиевла пьеса хIя­сиб­ли «Дила кIиибти дяхI». Ва гIурра хIер­бикIутас гIяхI­дизести ва ур­кIи­ли­зи атIести сагати спектакльти хIя­­дур­дирули саби театрла режиссёртани.
Театрла гIяртистунала лугIи гьар дус яра имцIа­би­кIули саби, яра кам­­бикIули саби. Театрлизиб бузули калунти машгьурти гIяртистуни саби: Россияла халкьла гIяртист На­­би Ибрагьимов; РФ-ла бу­риб­ти гIяр­тистуни — С.ГIялибеков, С.Абу­­­­­­муслимова, М.Кем­цIуров, Н.ГIя­­­лиев; Дагъиста халкьла гIяр­тис­­туни — М.Шапиева, ХI.ГIи­саев, И.Мя­­­хIяммадова; Да­гъис­та бу­рибти гIяртистуни — Р.Алхасова, Ю. Мус­та­паев, М.ГIямаров, ГI.БяхIямматов, М.Мя­­­хIяммадрасулов; ПасихIкар гIяр­тист — З.Мусаева. Гьанна бу­ся­гIятра пенсияличив сай Дагъиста уриб­си гIяртист Р.Чараков. Гьаннара бузули саби РФ-ла ва ДР-ла бурибти гIяртистуни, илдазивад гьанушес ви­рар — искусствола хIяракатчи М. Иб­­рагьимов, Дагъиста халкьла гIяр­тистуни — М.НухIов, ГI.Ризванов, Да­гъиста бурибти гIяртистуни — Р.Ис­мя­­гIилова, ХI.Рабаданов, Н.Ид­­­­ри­сов, А.Да­­циев, С.Каримо­ва, М.ШяхI­­ба­нов (ИцIаринский — ила­­ла твор­­чес­­кий псевдоним са­би.), Да­гъис­­та рурибси культурала хIян­­чи­­зар — С.Шагьмандарова, гIяр­тис­туни — А.Ба­тиров, ГI.ГIялиев, И.ХIя­­санов, ХI.Ими­­нов, М.ХIусенов, М.Мя­­хIям­ма­до­ва, Б.ГIябдуллаева, М.Ас­кан­да­рова, С.Илья­сова, ГI.Илья­сова, Х.Иб­­ра­гьи­мо­­ва, З.ГIя­зизова, Л.Мя­­хIянд­гIя­лиева, ГI.ГIя­­­л­ибеков, Р.Илья­сов. Жагьти гIяр­тистуни: М.Ра­ба­да­нова, Х.Мя­­хIям­­ма­до­ва, П.Па­­шае­ва, М.ГIя­­лиев, М.Ма­таев.
Театрла гIяртистуни, режиссёрти, дирекция, администрация, кумекла са­ни­гIя­тунала бегIти (костюмерти, реквезиторти, палтар ибанти, цехлизиб бузанти, тIамри, шала хIя­дур­диранти…) хIер­бикIутас дяхI шалали гьунибиэс даим хIядурли саби.
Даргала театр 65 дус биъниличил бархбасахъи, мубарак­би­рулра ва илаб бузути лебилра гIяр­тис­тунас, хIянчизартас чIумаси арадешра, кахIедурхути цIакьанира, ва творчестволизир гьамаддешра дулгулра. АхъбикIен, зайбикIен, бузен, ахIерси театр!!! 

МяхIяммадшапи Матаев