Набчи бекIлил хIеба­лу­си шилизирад зянкъ дакIиб. Илала тIа­мала чекайзурдешличи ва тIалаб­кардешличи ну та­ма­ша­риубра. Ил сайри Зиль­мукь­ма­хьила школала директор Саадула Къараев.
— Аминат ГIябдулманапова, нуша хIушани РГВК-лизир чедиахъути передачабачи мурталра хIердикIулра ва илдани разидирулра. ХIед баркалла илди дирнилис.
Ну Зильмукьмахьила школала директор сайра. Нушала школа гьанна 90 дус биубли саби, леб бахъхIила учительтира. Школа таманбарили ва чебяхIси даражала багьудиличил бегIбиубли, шагьуртазиб декIар-декIарти хIянчурбачиб бузути зильмукьантира леб. Школализиб 50 дус хIянчи барибси мугIяллим, ЧебяхIси ВатIа дергъла бутIакьянчи, бу­зе­­рила ветеран Сул­­тIанбегов МяхIяммад ГIялиевичра лев­си­­ри, гьанна ил нуша-ургав ага­­ра.
Асубирару нушала школаличила передача барес? Нушала зяхIматчиби лебни даргантази багьахъес дигулрану, ракIигу рузи.
ТиладибарибхIели хIявкьес вирару. Ил махьилизи операторличил барх бузерила архIя дураберкIира. Махьилизи гьуни чебаахъес адамтира бакIиб, баркалла биабну чус!
Даира Зильмукьмахьилизи. Школала дурхIни ва учительти нушаб разили гьунибаиб. Ахъушала районнизибад бакIибти хIян­чизартира лебри: районна бекIла заместитель Эльвира ХIя­санхIусейнова, ДР-ла рурибси учительница, ба­гьудила управление­ла хIян­чи­з­ар Наида ХIусенова, Ахъуша­ла культурала управлениела хIян­чизар БяхI­муд Булатов ва цар­хIил­ти­ра.
Жагабарилри шко­лала зал къу­гъа­ли бегIбиубти дурхI­­нани. Ил­ди-ургаб лебри учи­тельти-ве­­терантира. Вечер бузахъулри Избербашла культурала КIялгIяла хIянчизар ХIяс­буллагь Кьурбановли (Алан) ва урус мезла учительница Заира Мур­гучиевани.
Алкахъунти чиргъмачил дурхI­ни сценаличи дурабухъун ва гьарилли учительтас хасдарибти дугьби дуриб. Телевизорла экраннизибад гъайбухъун декIар-декIарти дусмазиб школа таманбарибти выпускникунира.
8-ибил класслизир ручIуси Аминат МуртузагIялиевани наз­мурти делчIун. Ил къушум жагабариб МяхIяммад ШяхI­бановлира (ИцIаринский). Гъайрухъун 40 дус школализиб хIянчи барибси учительница ЖумягI БяхIяммаева Кьасумовна: «ИшбархIи хIушаб дузахъес ва дучIахъес гIяхIти имканти лер. Гьалар телевизорти, техни­ка хIедири, амма дурхIнани учи­тельла хIурматбири. Баркалла биаб хIушаб нуша, духъ­накадаибти мугIяллимти, иш балбуцличи жидарнилис. ДучIеная, дурхIни. Гьарбизаб хIушаб белчIудилизиб!»
ЦагьатIи рахъхIила учительница Урузмаг Шагьвалиеванира мугIяллимти мубаракбариб ва наб хасбарибси назму белчIун. 150 дурхIя дураира, ишди лебилра нуни бучIахъули калунти дурхIни саби или буриб.
ДР-ла рурибси учительница, Ахъушала урга даражала школализир нешла мезла ва урус мезла мугIяллимли рузуси Жамилат Халикьованира бахъхIила учительти мубаракбариб ва илдас хасбарили сунени белкIунси назму белчIун.
МяхIяммад ГIялиевич гьаниркахъули, ванати дугьби дуриб школала директор Саадула Къараевли.
— ЧебяхIси ВатIа дергъли­зир бутIакьяндеш дарили, ор­ден­тачил чарухъунсири ил ва школализиб 50 дус хIянчи ба­рибсири. Илини нушала дурхI­нас гъабзадешла дурсри кадирхьи. Наб дигулра ил учительла хIурматлис школала гьалаб памятник тIашбатес. Дила пикри шантанира гIеб­бурцу или гьанбиркули саби.
МяхIяммад ГIялиевичла уршила (рурсила) рурси Арзигульлира «Ухъяна атта» бикIуси назму белчIун.
Россияла урибси педагог, рес­публикала 2020-2025-ибти дусмала мугIяллимтас хас­ба­риб­си конкурсла-лауреат, «Да­­гъис­­та бегIлара гIяхIси пред­мет­­­ник» конкурсла муници­па­ли­тетла бутIализиб чедибдеш сар­хибси, Северный Кавказла фи­зикала мугIяллимтала семи­нар­ла бутIакьянчи Саадула ХIям­­­затовичличила гIурра им­цIа­­­ли багьес дигули, суалти хьар­­­­даира.
— Учительла хIянчи – адамла чеахъдешра гьарил бархIи дурабуркIуси гьунарра саби. ДГУ-ла физикала факультет белчIи гIергъи, узули калунра Ахъушала школализив, илхIели ну «Дусла учитель» ветаурсири. Усишала шила багьудила управлениелизив узути дусмазирра сархибдешуни диахъубтири нуни, — викIи ил.
Илис баркалла багьахъурра. Дерхъаб хIела гIямру, хIур­мат­ла Саадула ва гьардизаб хIела кьасани. Аллагьли гIе­ву­цаби!