БерхIи гIелабикалли, заклизир урми дакIудулхъан, къияндешуни чедакIалли – гьарли-марти гъубзни. УркIби чIумати, хIер саргъибти дубурлантани душмайс мурталра чIумаси бяхъ чейгахъусири, гьаннара чейгахъули саби. ЦархIилти регионтачил дарх Украинализиб бетурхуси Россияла дявила хасси балбуцлизир жигарла бутIакьяндеш дирули, нушала республикали саби улкала белхъхIебелхъуси бутIа биъни чебиахъули саби. СВО бехIбихьибхIелил итмаданал улкализир дагъистанлантала гъабзадешличила хабурти тIинтIдиуб. РФ-ла Президентли гIярмияла гьалар тIашдатурти масъулти ункъли тамандируси цалра дагъистанлан мажахIят шабагъатуначила пикриикIули ургар. ВатIайчирти дигили саби дубурланти илала хъархIерагардеш батахъес шанда баруван кабилзахъутира. Нушала гIяхIгъабза дурхIнала игитлати гьунартани чула тухумтицунра ахIи, лебилра дагъистанланти буланра пахрули бирцIахъули саби. Дубуртар Улкала асилти уршбала гъабзадеш Россияла ва Дагъиста руководстволи ахъли кьиматладирули сари.
Сергокъалала районна ХIурхъила шилизивадси СВО-ла бутIакьянчи, гвардияла младший сержант ХIямид Гадаевлира СВО-лизир бутIакьяндеш дирули сай. Дявила хасси балбуцлизир гъабзадеш дакIударни багьандан, улкала Президент В.Путинна ХIукмуличи хъарахъили, Суворовла медальличил шабагъатлавариб. Илкьяйдали гIяскуртала бутIала командиртани «Гъабзадеш багьандан» бикIуси медальличира гьалаихьили сай.
ХIямид Гадаев «Дагъиста халкьла игит» ибси хIурматла уличи ва «Мургьила Зубари» медальличи лайикьикили сай. ДР-ла жамигIятла комиссияла 2023 ибил дусла октябрьла 13-личибадси ХIукмуличи хъарахъили, СВО-лизир гъабзадеш ва игитдеш дакIударни багьандан саби ХIямидлис илгъуна хIурматла у бедибси.
РФ-ла оборонала министрла буйрухъ хIясибли, дявила чебла ихъухIели, декIарухъни багьандан ХIямид Гадаев «Дявила асилдеш багьандан» бикIуси 2-ибил даражала медальличил шабагъатлавариб. Ил илкьяйдали «Ветеран боевых действий», «Честь и слава Дагестана», «За ратную доблесть» ибти медальтачира лайикьикили сай.
ХIямидлис чIумаси арадеш, халати яхI-сабур дулгулра ва чедибдешличил хъули чарухъи дигулра!
П.Мирзаева
