Къаякентла район­­­низи ка­бурхуси Ша­ла­си би­кIуси шилизи рукьес ну рахъхIи хьулрикIусири. Ахир­ра дила хьу­лани дартаур. Да­ха­даевла ­район­ни­зи­бад геч­биубти ­даргантала ши саби ил. Хуршнила, Бакь­нила, СутбукIла ва цар­хIил­тира шимазибадти халкь уз­би-рузбиван балги хIер­би­рули саби, ил­кьяйдали Агъул­ли­зибад, Табасарайзибад ба­­кIиб­­тира леб, гIурра къумукъ­ланти ва цар­хIилтира.
Ил бархIи школализиб са­кIуб­­­дешри. БегI гьалав гъайухъун школала директор ГIя­ма­ров Руслан ГIямарович. Илини школализиб бузути 23 учитель лебниличила буриб. Школа биалли 2019 ибил дуслизиб сагали барибсири. Илизиб 110 дурхIя бучIули саби. Леб гIяхIил бажарди­биркутира, амма ЕГЭ бедахъес дурхIни Да­хадаевла район­низи, Уркухъи бикули саби. Да­гъиста че­бяхIси даражала ву­занази, Санкт-Петербургла дя­вила учи­­лищелизи каберхуртачилара буриб.
ОБЖ-ла дурсри кадирхьули 20 дус узуси ХIяжиев Мухтар ХIусейновичла гъай хIясибли, дявила шайчибси хIядурдеш дурхI­нани иштяхIличил дура­буркIули саби ва дявила училищелизи кабурхули саби. Районнизир дурадуркIути дявила хIядурдешла абзаназиб бутIакьяндеш дирули, гьаларти мерани сархули саби 8-10-ибти классунала бучIантани.
Школала бегIлара саберхурти, дурхI­нала багьудлумачи чекабизурти наз­мурти лу­кIанти, поэтунира бузули са­би ил школализиб. Сут­букI­л­и­зирадси ГIяхIмадова Па­тIи­мат МуртазагIялиевна 29 дус рузули сари дарган мезла ва ли­тературала учи­тельницали­. Илини Избербашла колледж таманаили гIергъи, ДГУ –ла филологияла факультетра белчIун. Илини бурни хIясибли, шилизиб чумал миллатла халкь леб ва илдала дурхIнира дарган мезла дурсрачи башули саби. Леври Иван бикIуси урус уршира, ил бажардииркулри дарган мез дяркъесра. Хъулиб бегIти гъайбикIес хIяжатсигу чула мез дагьахъес. Нушаб гьанна къиянбулхъули саби ил масъала, сенкIун дурсрала лугIи камбарили саби. Биалра дила бучIанти бажардибиркули саби. Шагьарлизир дурадуркIути олимпиадабачиб бутIакьяндеш дирули саби ва цаибти мерани дирцули дирар. Арбякьунси дуслизиб «Замана» газетала хIянчизартани дарган мезлис хасбарибси кон­курс дураберкIиб, иличирра цаибти мерани касиб илдани. Нуни назмурти лукIулра ва дурхIнира лукIахъес бурсибирулра. Илди «Гьалмагъдеш», «Лачин» журналтази, Къаякентла районна газетализи ва «Замана»-лизи кадирхъули сари. Нуни дурхIнас даргала куль­туралис, тIабигIятлис хасдарибти сценкаби дирулра даргала писательтала произведениеби хIясибли. Нушала гIяхIил ручIуси Марта бикIуси ручIанни ДГУ–ла факультет ХIун­тIена дипломличил таманбариб ва ма­гистратурализи карерхур. Илра нушала пахру сари», — буриб ПатIимат ГIяхI­ма­­довани.
Ну тамашариахъубра цар­хIил учительлира, Хуршнила шилизивадси Рабадан Ражабовли. Ил школализив вахъхIи узули сай, илала гIямрула гьу­нира тамашала саби. Избербашлизиб училище белчIи, Ставропольла сельхозтехни­кумра таманаиб, кIинайс инс­титутра, гIур чарухъун. Дахадаевла районнизив жура-журала хIянчурбачив узули калун, гIур Шаласи шилизи вархьиб. Илини дарган мез ункъли далули сай, илис бикьрили детаур назмурти лукIни. Дахъал назмурти делкIи сай илини, назмуртани бицIибси папка дурасиб. Илала назмуртала темаби жура-журала сари: Хуршни ва Шаласи шимас, дергъла бу­­тIакьянчибас хасдарибти. Ил учитель-ветеран сай. Илини нушаб гIяхIцад назмурти дел­чIун. Хъули дукили нушаб гIя­хIял­дешра дариб. ИшбархIи ил­­дигъунти адамти лебниличи де­бали разилира, дубурлантала яхI-ламус мяхIкамли ди­хIу­т­и.
ПатIма Ражабованира ну­шази дурхIначил бируси хIян­чиличила буриб. Илини кумекчибала кьукья акIахъубли сари, илкьяйдали «Лига первых» бикIусира леб. Школализиб ду­рабуркIуси балбуцлизир ил­да­ни жигарла бутIакьяндеш ди­рули сари.
Ну илкьяйдали тянишриубра общест­воз­­наниела учитель­ница Гульнара Ацие­вачил. Ил Сут­букIлизирадси сари. Росгвардиялизив къуллукъбируси илала мурул МяхIяч­къа­лализир вайти анцIбукьуни ка­дикибхIели декIли вяхъили ал­хунсири. Гьанна хIябал дурхIя иличи хъарбикили саби.
Баркалла балахъулра нуни ил школализиб гьунибаъни ду­ра­беркIибти учительтас ва дурхI­нас. ДиштIати шимала халкь дебали чекабизурти, чIу­маси яхIла бегIти сабливан балулра нуни ва илдачилти гьунибаъниби хъумхIертестили дирар. Берхъаб нушала дубурланти! 

Аминат ГIябдулманапова, Дагъиста халкьла поэт