Дагъистан жагаси тIабигIятличил ва урхIмешуахIенси культураличилцун ахIенну машгьурси, сунезибти культурала, политикала, арадеш мяхIкамбирнила яра гIилмула бурибти хIяракатчибачил саби.
ХIера, илдигъунти хабардерхурти гIялимтазивад ца сай философияла гIилмуртала доктор, профессор, ДГУ-ла психологияла ва философияла факультетла жамигIятла ва политикала гIилмурти руркъуси кафедрала заведующий ЯхIъяев Мухтар ЯхIъяевич.
Ил акIубси сай Дахадаевла районна Хъярбукла шилизив 1959 ибил дусла июльла 21-личив. Илала хала дудеш ЯхIъя мурхьти багьудлуми касибси адамри, илини чедетаахъили гIярабла мез дяркъурсири. Шилизив кьадили узули калун. Шантани ил гIяхIси насихIятчи сайливанра ункъли валусири. 1919 ибил дуслизив (граждан дургъби) ши чябхъинтазибад батахъес чIумали кайзурсири ил.
Дудеш, суненира хала дудешла у бихуси, ЧебяхIси ВатIа дергъра ахъили, шилизи чарухъунсири ва декIар-декIарти хIянчурбачив узули калунсири: школала заведующийли, колхозла председательли.
Мухтар ЯхIъяевич, Уркухъла урга даражала 1-ибил школа ункъли таманбарили, Донничибси Ростовла пачалихъла университетла философияла факультетлизи керхур. 1982 ибил дуслизиб ил, санигIят касили, ахIерси Дагъистайзи чарухъун.
М.ЯхIъяевла педагогла бузери ДГПУ-лизиб бехIбихьибсири. Авал дус илав кали, ДГУ-лизи шурухъунсири. Ва халаси пре­по­давательличивад вехIихьили профессорличи ваайчи узули калун.
1988 ибил дуслизиб Мухтар ЯхIъяевичли Ростовла университетлизиб гIилмуртала кандидатла хIянчи кабизахъур­сири. 2002-ибил дуслизиб илини кIиэсил чебяхIси даражала багьуди касиб — ДГУ-ла юридический факультет хъараахъур.
Амма 2006-ибил дуслизиб илини кабизахъурси «Религиозные фантазии как социально-исторический феномен» ибси уличилси гIилмуртала докторла диссертациялис гIергъи, М.ЯхIъяевла гIямру дебали дарсдиуб. Ил тема бекIлибиубсили бетаур илала гIергъити гIилмула хIянчурбасра. 2007-ибил дуслизиб илис «профессорла» хIурматла у бедибсири.
2003-ибил дусличивад вехIихьили, философияла (гIурхIели философияла, жамигIятла-политикала гIилмурти руркъуси) кафедралис бекIдеш дариб. Философияла ва психологияла факультет акIахъубхIейчирад (2011 ибил дус) М.ЯхIъяевли илис бекIдеш дирули сай. Илала бекIдешлиуб факультет Северный Кавказлизибси философияла ва дин руркънила масъулти ирзуси центрли бетаур.
Мухтар ЯхIъяевли 300-цад гIилмула хIянчи делкIун. Гьарли-марли илала бузерила сархибдешуни дебали дахъал сари, илдачила гъайикIалли, газетала бяхIянира хIедиур.
БелкIла ахирличиб наб бурес дигуси: Мухтар ЯхIъявичлис дулгулра чIумаси арадеш, хъулиб баракат ва бузерилизир гьамаддешуни, гIуррара дахъдааб хIела сархибдешуни.