Иш яргалис нуни пик­ри­барира, мугIял­лимла БархIилис хас­барили, 40 дусличивра имцIали мугIяллимли узули калунси дила сагаси юлдаш Жамбулатличила макьала белкIес.
Пергер адам сай дила юлдаш хъярбукан Жамбулат Жамбу­ла­тов. Бурасли, гIергъити дусмазив ну сагали тянишиубти адамтачил юлдашдеш дарес къала­ба­хIейкIули вираси. «ХIела убла юлдашунира хIербарили, хIура уэн, — сабри дила хьулчилибиубси пикри. – УхънаваибхIели се бирути хIед сагати юлдашуни?» Ил пикри бархьсира бургар, амма Жамбулатличила или викIес гьеч цугхIебиркнира балулра нуни.
Жамбулатличилра ну гьанна кьанни сайра тянишиубси. Гьаланачив савли урхьула дублав къунзикIес вашухIели, ил наб кам-камли къаршивиркули вири. Гьанна биалли, нуша бархIилис къаршидиркулра.
Гьар бархIи савли илди хIя­балра юлдаш – хъярбукан Жам­булатра, уркухъанти Арсенра, Русланра – Редуктурный по­сё­локлизибси урхьула дуб­лаб къунз­бикIути саби. Гьаланачиб илди хIябалра илар даарила кьадарла лерти спортла гIягIниахълумазиб биркьур, гIур, сегъуна- дигара аргъ биаб, шиннизи бухIнайхъур ва куртIбикIар. Илис гIергъи гъамбирар ну кайибси скамейкаличи, набчил ля­кьир­бикIес кьасли. Ну илдала ил баркьудиличи тамай бур­сикайуб­лира: рахли савли илда­зивад цалра чехIеасли, дила уркIила гьав вайла шайчи барсбирар.
Сентябрьла 14-личив нушала Жамбулат 70 дус вирусири. Ил бархIи бархIехъ илини 70 дусла юбилей сунела хъалибаргличил, тухумтачил, бахъхIила юлдашуначил рестораннизиб дураберкIиб. ГIергъиси бархIи нушачилра бариб илини сяхIбат. Ил шадлихъличир лерти нуша ца вецIал адамри. ИлхIели наб гьанбикиб, шадлихъличирти нуша сунела ца районна адамти ахIенти, Жамбулатла бахъхIила юлдашуни бургар викIули. Дебали тамашавиубра ну илдачилра Жамбулат, нушачилван, урхьула дублав тянишиубси виъниличила багьурхIели.
Урусунала лерти сари «душа-человек», «душа-парень» бикIути дугьбала цахIнабикуни. Даргала мезли илдани иргъахъуси «хIялимси адам» бикIуси мягIна саби. ХIялимси адам сай нушала Жамбулат. Ил дугьбала цахIнабик иргъес гIягIниси саби «халкьличи дигичевси», «валикибси», «малхIямси» ибсиван. Ил багьандан саби Жамбулатла бахъал юлдашунира лебти.
Дила гIямрула гьунчи мешудешра леб Жамбулатла гIямрула гьунилизиб. Ил багьанданра наб Жамбулат дила дебали гъамси юлдашван вилзули сай.
Гьари, дурисра илала гIямру­личилара ца-чумал баян.
Жамбулат Кьурбанович Жамбулатов акIубси сай 1956 ибил дуслизив Кавказлизибра хабардерхурси ярагъла устнала Хъярбукла шилизив. Илала дудеш Кьурбан ЧебяхIси ВатIа дергъла бутIакьянчи вирусири, неш Загьидатли хъали-цIа дузахъутири. Шел узира авал рузира лебри илдала халаси хъалибарглизиб.
Хъярбукла школализиб 9-ибил класс белчIунси Жамбулатли 1977 ибил дуслизиб Избербашла педучилище таманаиб. ИлхIели Жамбулат Лавашала районна Хажалмахьила школализив бехIбихьудла классунала учительли узес вехIихьиб.
1977-1979-ибти дусмазиб илини гIярмиялизиб къуллукъбариб, Тулализиб, гьавала десантла гIяскуртазиб. ГIярмиялизиб къуллукъбирухIели, ил КПСС-лизира уцибсири. 1980 ибил дуслизиб Хажалмахьила школализиб мугIяллимла хIянчи даимбариб. 1983 ибил дуслизив Жамбулат Къаякентла районна Первомайское шилизи гечиуб ва илабси школализив мугIяллимли узиб.
1981-1986-ибти дусмазиб, ДГПИ-ли­зив заочноли учIули, ис­то­­­рический факультет таманаиб ва Первомайскла гимназиялизир та­­рихла дурсри кадирхьес ве­хIи­хьиб.
1983-2018-ибти дусмазив ил илав историяла учительли узиб, 1986 ибил дусличивад — завучлира. Жамбулат Каспийсклизив кадетская школализивра узули калунси сай. 2020-ибил дуслизиб Жамбулатли учительла хIянчи бархьбатур. БусягIят нушала шагьарлизибси «Приморская» гостиницала къараулли узули сай.
1980 ибил дуслизив хъайчикайиб. Хьунул Насибатлира суненира авал дурхIя абикьур, 3 рурси ва ца урши. Ил жявлил хала дудеш ветаурли сай. Илала 12 дурхIнала дурхIнира леб. Лев ца уршила дурхIяла дурхIяра. Илдазибад, биштIали лебалли, спортла хIязаначил бархбасунтира леб. Жамбулатла рурсила 15 дус риубси рурси Алина гимнастикала шайчирси спортла мастерла кандидат сари. Жамбулатла уршила урши, 10 дус виубси ГIябдусалам гимнастикала шайчив кIина Дагъиста, гьачам Новороссийскла ва гьачам Москвала чемпион ветаурси сай. Жамбулатла итил рурсила 16 дус виубси урши Ражаб кадизахъурти тяхIяр-кьяйда агарли бирхIнила шайчивси МяхIячкъалала чемпион сай.
Жамбулат «ДР-ла хIурматла хIянчизарла у»-личил ва «Бузерила ветеранна» лишанничил шабагъатлаварибси сай.
Урхьула десантла капитан, сунела юлдаш Жамбулатлис илала цакурслан, Дахадаевла районна Шаласи шила школала учитель Рабадан Ражабовли белкIунси ца назмура гьалабирхьулра.

Дила юлдаш Жамбулат

Рабадан Ражабов
Ахъси шурла хъинжличиб
Ши белшун хъярбуканти,
Сарра хIуша гIяхIгъубзни,
ГIяхIяллис унза гьаргти.

Жан айсуси жалладра
Жагьаннаблизи викаб.
Кьурба Жамбулатлисра
Арадеш имцIабиаб.

Анкъи ванали бихIес,
Ратаб хIед Насибатра.
ГIямру хIулкIули деркIес,
Калабгу хъалибаргра.

ХIу дигул узби-рузбас
Разити гIямру дедаб.
Илдала кулпетунас
Дунъяла давла бедаб.

ХIуша-ургаб акIубти
Рурсби мурадли бааб.
АхIерти биштIатачил
ХIулкIули гIямру деркIаб.

Хъяр бизили букути
Хъярбук хъябруцли башаб.
Дудешла у бихуси
Кьурбайс арадеш биаб.

Кьурба ва Загьидатла
Дебали дигул урши,
ЗайбикIаб хIела тIама,
БулхIехъули лебил ши.

Мегь-шандан кIантIибарес,
Някълизи кьуват бакIаб.
Тухумти разибарес,
ХIед гIеркъати гIямру габ.

Бамсалра гIяжиз Ванза
БерхIи-алав ласбикIес,
Хуршлан Рабадан хIемсар
ХIед назмуртани лукIес.
Жамбулатра, илала юлдаш Рабаданра ва цархIилти дарганти учительтира нушани арбякьунси учительла БархIиличил мубаракбирулра. Дулгулра илдас арадеш, талихIчерти гIямру, хIянчилизир сархибдешуни ва яшавла эркиндеш.
ХIушала БархIиличил, ахIер­ти мугIяллимти!