Бутрила шилизивадси пагь­­му­чевси художник Зул­кьар­най Рабаданов акIуб­­си сай хIурматла хъалибарг­лизив.
Зулкьарнай Рабадановли Дагъис­та пачалихъла М.Джемалла уличилси художественное училище, гIур Москва шагьарлизибси В.Су­риковла уличилси пачалихъла академичес­кий художественный институтра та­мандариб. Институт таманбарили гIергъи жагьси художник бахъал художникуни букьес дигуси «Грековская студиялизи» живарибсири. Амма Зулкьарнай Рабаданов сай акIубси, сунела биштIаси ВатIан Да­гъистайзи чарухъун. Художественное учили­щелизив преподавательли ва художестволашалси фондлизив узес вехIихьиб. Илини студентунала пагьмурти имцIадикIахъули узули, бузерила гьуни бехIбихьиб, коллективла ва студентунала-ургаб халаси хIурматра сархиб.
1967 ибил дусличивад вехIихьили Зулкьарнай Рабадановли дахъал халкьани-ургарти, лебил Союзла, мер-муса хIясибти ва республикала кьадрила выставкабачир бутIакьяндеш дирули сай. Художникла «Халкьла устни» бикIуси дипломла хIянчи-триптих (хIябал бутIализибад цалабикибси искусствола произведение) дебали ахъли кьиматлабарили саби. Ил лугIянси хасси чIянкIилизир (полотно) лер «Кубачинская кузница», «Ковровщицы» ва «Кубачинские мастера» бикIути суратуни. Илди суратуни «Советский Юг» бикIуси выставкаличирра гьаладихьибтири.
Зулкьарнай Рабадановли халаси устадешличил дирес балули сай портретуни, тIабигIятла ва жура-журала суратуни.
1996 ибил дуслизиб илала цаибил сай-вегIси выставка бетерхурсири США-лизиб, сунесра «Панорама села Бутри» бикIуси. Лер художникли дарибти тIабигIятла, археологияла шайчирти адамтачилра дархдасунти дахъал суратуни.
Сунела 60 дусличибра имцIали биуб­си бузерила гьунчир З.Ра­ба­да­нов­ли шел азирличирра имцIали жу­ра-журала сурат ва азир­личирра им­цIали акварельти дарили сай. Илкьяй­дали, ил пагьмучевси художник мо­нументально-декоративное искусствола шайчивра ус­тадешличил узули сай, къаркъуба­зи­рад, урцуйзирад кьис­дарили, ваяхI дирули сай, луцразир белкIани, някьишуни, мегьлизир някьишуни дирули сай.
Зулкьарнай Рабадановла бузери пачалихъла шайзибадра кьиматлабарили саби, ил ДАССР-ла искусствола урибси хIянчизарла, Россияла урибси художникла умачи лайикьикили сай, ХI.ЦIа­дасала уличилси республикала кьадрила Премияла Лауреатра ветаурли сай.
Зулкьарнай Рабадановла хIянчи гьаладихьили сари Москвализибси художникунала Союзла художественный фондлизир, Иркутск, Екатеринбург, МяхIячкъала шагьуртазир, Лондон шагьарлизибси Миллатла галереялизир, илкьяйдали, лер тIалабдарили коллекционертани Россиялизир, США-лизир, Ираннизир, Турциялизир, Индиялизир ва Венгриялизир.
З.Рабадановли сунела суратунира гьаладихьили, дахъал выставкабазир жигарла бутIакьяндеш дирули сай.
1969 ибил дуслизир ­художникли Ленинград шагьарлизиб бетурхуси «Декада литературы и искусства» би­кIуси ва Ставрополь шагьарлизиб «Советский Юг» бикIуси, 1971 ибил ва 1989 ибил дусмазир Москва шагьарлизир дурадеркIибти 1-ибил ва 2-ибил «Всероссийская выставка произведений художников автономных республик, областей и национальных округов РСФСР» бикIути выставкабазирра бутIакьяндеш дариб.
Зулкьарнай Рабадановли 1974 ибил дуслизиб Орджоникид­зе­лизиб, 1979 ибил дуслизиб МяхIяч­къа­лализиб, 1984 ибил дуслизиб Нальчик шагьарлизиб дурадеркIибти «Советский Юг» бикIути выставкабазирра бутIакьян­деш дариб.
1981 ибил дуслизиб МяхIяч­къа­лализиб бетерхурси республикала кьадрила ДАССР 60 дус биънилис хасбарибси выставкаличирра, 1984 ибил дуслизиб Горький шагьарлизиб бетерхурси «Выставка произведений дагестанских художников» бикIуси, 1989 ибил дуслизиб Баку шагьарлизиб дураберкIибси «Биеннале (кIел дусла бухIнаб гьачам бируси конкурс, яра выставка) прикаспийских республик» бикIуси, 1995 ибил дуслизиб Нью-Йорклизиб лебил дунъяла кьадрила художественная выставкабачир бутIакьяндеш дариб ва ил дуслизиб Америкала Паттерсон шагьарлизиб сай-вегIси выставкара бетерхурсири.
1996-2000-ибти дусмазир Мя­хIяч­къа­лализиб бетурхуси «Золотой штрих» бикIуси республикала кьад­рила конкурсла шайчибси выставка­ба­зирра бутIакьяндеш дарибтири Зул­­кьарнай Рабадановли.
Илкьяй­дали илини Дагъиста дурар детурхути гIяхIцад выставкабачирра бутIакьяндеш дариб.
2011 ибил дуслизиб МяхIячкъа­ла­лизибси П.ХIямзатовала уличилси Дагъиста изобразительное искусст­вола музейлизиб «Персональная выс­тавка З.Рабаданова Живопись» би­кIуси сай-вегIси выставкара бетерхурсири.
2022 ибил дуслизиб художникунала Союзла заллизиб «Ашура» бикIуси выставка бетерхурсири. Ил выставка Зулкьарнай Рабадановли сунела гIямрула рархкья, мурталра сай гIевурцуси, суратуни дирахъес ур­­кIичеввируси адам – ГIяшура гьанрир­кахънилис багъишлабарибсири. Ил выставкаличиб лебри гьалабихьили сунени барибси ГIяшурала суратра.
Ишдус З.Рабадановли 90 дус виънила юбилей барибси саби. Ил юбилейличил дархдасахъи, дахъал дусмазив изобразительное искусство, ДР-ла культура гьалабяхI арбукес багьандан хIялалси хIянчи барнилис ва халаси пай кабихьнилис пагьмучевси художник ДР-ла культурала Министерствола шайзирад пачалихъла шабагъатуначи ва Баркаллала кагъарличи лайикьикиб.
Россияла художникунала Союзла Дагъистайзибси отделениела председатель КьурбангIяли МяхIяммадовли ва Россияла халкьла художникла уличи лайикьвикибси Гейбат Гейбатовли Зулкьарнай Рабадановлис Россияла художникунала Союзла медаль бедили, гьатIира уркIичевварили сай.
Нушала шайзивадра мубаракварес дигулра Зулкьарнай Рабаданов. Бузерилизир гьатIира сархибдешунира имцIадикIаб!