«Вашусини бирар гьуни ихъуси» бикIуси бурала МяхIяммадов Хадижат Исматуллаевнала гIямруличи ва бузериличи хасси саби. Илала къиянси гIямрула гьуниличила бурули саби Х.Исматуллаевнала «КIиша. Тарихла бяхIяни» бикIуси жузлизиб. Хадижат МяхIяммадова пагьмучерси хIялумцIан ва дебали тамашаласи хабарчи сари. Гьанна биалли илала пагьму бегIлара хъилизи бизурси манзил саби. 

Хадижат МяхIяммадовани барибси хIянчила кьадарли нуша тамашадирахъулра. Илцадра дахъал баянти дучес ва кьукьначи дутIес: «КIишала жявхIелла махьурби», «КIиша — ургарти дусмала манзиллизиб», «XVI- XVII- ибти дусмазир КIишала социальный бяхIчибизла кьяли ва экономика гьаладяхI ардукьни», «КIишантала рухIла давла»… гьамадси хIянчи ахIен.  

Жузла бухIнабуцличила ишаб бурес хIейрус, амма гьанбуршисра, илала гьарил бутIа сунени ахъибси манзилличила саби. Илар авторла уркIила хIялани аргъес вирар. КIишантачил ва чеалкIуси наслуличилцун  ахIенну, лебил Дагъистанничил Хадижатла ихтилат илаб чебаэс вирар.

Турцияла Гюней-кой шагьарлизир гьаларван даргибти архивла баянтачира Хадижат МяхIяммадовани пикри бяхIчиаиб. 

Хадижат Исматуллаевна уркIи-уркIиларад мубаракрирулра, илцадра халаси хIялумцIла дураберкIниличил. Бузерилизиб гьаммаддеш булгулра.

МяхIяммадзагьир Кьурбанов, РАН-ла ДФИЦ-ла ИИАЭ-ла гIилмула бекIливиубси хIянчизар, тарихIла гIилмуртала кандидат