Гъабзадешра игитдешра хаслира ахъли кьиматладируси ишхIелла манзиллизиб дявила майдайчиб гьаларти къяяназиб бургъули гьарли-марти багьадурти леб. Илдигъунти гIяхIгъубзназивадли ца сай майор Кьурбан ХIяжиев. Илини вягIда хIясибли Донецкла Халкьла Республикала МВД-ла духIнарти гIяскуртала дявила частьлизиб къуллукъбирули сай.
2023 ибил дусла октябрьличивадли майор Кь.ХIяжиевли, бикIуливан, жан хъябла дигьи, дявила хасси балбуцлизир хъарбаркьуни тамандирули сай. Илини сунечи хъарти къуллукъуни тамандирулицунра ахIи, илини гьар бархIилизир гъабзадешла ва гьунарла баркьудлуми дурадуркIули, гьарли-марти игитдеш чедиахъули сай.
Майор Кь.ХIяжиев ВатIайс мардешличил къуллукъбирни багьандан, ахъси даражала шабагъатуначи лайикьикиб. Илала санигIятлати устадеш ва залумдеш багьандан 2020-ибил дусла октябрьличиб илис Гъабзадешла Орден бедиб. 2023 ибил дуслизив биалли, улкала хъархIерагардеш далтахънилизи пай кабихьни багьандан, «ВатIа гьаларти къуллукъуни багьандан» II ибил даражала орденничи лайикьикиб.
Кь.ХIяжиевгъунти игитунала гIяхIдешличибли нушала челябкьла шаласили бетарниличи дирхес дирехIе. Илдигъунти багьадуртала гъабзадешли нуша лерилра уркIичердирахъулра. Илкьяйдали уркIи-уркIилабадси баркалла багьахъес лайикьли сай Кьурбан ХIяжиев нуша урехиагарли хIердиахъес ва даршудеш биахъес багьандан гIяхIцад къиянти чекайсули, сунечи хъардарибти хъарбаркьуни ламусличил тамандирули сайну. ЧеалкIуси наслулис илала игитти баркьудлуми мисалли детарар.
Дахадаевла районна администрацияла пресс-служба
