Дагъиста шагьуртазир машинаби кадатес мерани хIедиъни хIекьли бугаси масъалали бетаурли саби.
Ил масъалали машинабала бегIти гьар бархIи нервабала ибкьдешлизи биркахъули чебиулра. ГIергъити дусмазир МяхIячкъала, Дербент, Каспийск ва цархIилти шагьуртазиб машинабала лугIи халабикIниличибли, дахъал хъулрачилти сагати юртани лушухIели, илаб хIербирутала машинаби кадалтахъес мерани гьала хили пикрилизи хIедурцниличибли илгъуна къияндешличил бяхIигули саби адамти. Юртанала гьаларти диштIати азбуртази гьарилли чус дигуси тяхIярли кадалтули сари машинаби, иличибли бет-садбулхъути адамтасра диргаладулхъахъули, къалабаси кумекла ва цIа дилшахъуси машинабасра гьуни гIеркIули. Илкьяйдали жярга-зекъ ардихуси машиналисра дебали диргаладулхъули сари хасти тIакьнала гьала кадатурти машинабира. Нясдешуна дицIибти тIакьни дацIдарес гIягIниси биъниличи пикрибулхъули ахIен цацабехIти.
Чус дигуси тяхIярли машинаби кадалтнила масъалали унрубала ургар гъай-мез алкIахъули сари. ДурхIначилти хъалибаргунас ва арадешлизир нукьсандешуни лерти адамтас ил масъала дебали къиянбулхъули саби. Челукьуси масъала арзахъес ибси мурадличил адамти муниципалитетунази дугьабилзули саби. Чула яргализиб муниципалитетунани хасти программаби хIядурдирули сари, амма гIямрулизир тамай детерхахъес балкьарули ахIен. Проектуни детерхахъес имканбикIули ахIен арц агнила ва ванзурби хIедиънила сабабли. Арц дедили машинаби далтути меранира дургар шагьуртазир, амма лебталалра имкан хIебирар илдигъунти мераначил пайдалабикIес.
Буралли, Совет хIукуматла замана машинаби тIашиути ва дашути мерани хIядурдарили белшунси гьундурала кьялиличи халаси гуж бетарули саби ишбархIи. Дахъал хъулрачилти юртани лушнила, жамигIятла транспортла кьяли гьалабяхI башахънила тяхIяр-кьяйда сагали хIерхIедаралли, бусягIятла заманализибси аги кIинали къиянбулхъан, сенахIенну гьарил сагаси машинали низамагардеш гьатIиралра имцIабирули саби.

ПатIимат Мирзаева