«Къуппала край руркънила, археологияла ва палеонтологияла музей» МКУК-лизи Лавашала районна Къуппала шилизибадти СВО-ла 9 бутIакьянчила хъалибаргуни жидариб.

Музейла заведующий Шамил ГIямаровли Граждан, ЧебяхIси ВатIа, Кавказ багьанданси дургъбазир къуппакунтли дакIударибти гъабзадешличила буриб, илкьяйдали чула дявила чебла ихъули ва хала дудешунала дурхъати гIядатуни даимдирули, нушала дубурлантани СВО-лизир дакIудирути гъабзадешличилара аргъахъиб.

Лавашала районнизибадти СВО-ла бутIакьянчибала хъалибаргуни гIердурцнилис ва илдас кумек гIеббиахънилис Шамил ГIямаровли районна бекI Мухтар ХалалмяхIяммадовлис ва илала бекIдешлиубти хIянчизартас баркалла багьахъур.

Илис гIергъи, Къуппала шила администрацияла бекIла заместитель М.МяхIяммадгIялиевли, «Цудахария» центрла руководитель Д.ГIябдулгIязизовли, Къуппала шила школала завуч М.МяхIяммадовли, Лавашала районна Цаибтала хIяракатла руководитель А.МяхIяммадовли, СВО-ла бутIакьянчи М.Абакаровли ва СВО-лизир  бутIакьяндеш дирути цархIилти бургъантала гъамтани жагьси наслулизир ВатIайчи диги адикьни мягIничебси биъниличила, СВО-ла бутIакьянчибани улкала тарихлизи кабирхьуси пайличила, илкьяйдали Къуппала музей акIахъубси ГI.ГIямаровли Дагъиста культурализи ва тарихлизи кабихьибси белгиси пайличилара буриб.

Музейлизиб экскурсия дураберкIили гIергъи, СВО-ла бутIакьянчи М.Абакаровлис, илкьяйдали цархIилти бургъантала хъалибаргунасра ГI.ГIямаровла ва Р.Сефербековла «Аул Куппа. Историко-этнографические очерки ХIХ-ХХ веков» бикIути жузи пешкешдариб.

«Къуппала край руркънила, археологияла ва палеонтологияла» МКУК