Даргала культура вавалибирхъяхънилизи мекелли халаси пай кабихьибси, ДР-ла халкьла гIяртист ГIисаев ХIясбуллагь Ибрагьимович акIубси сай 1935 ибил дусла февральла 23-личив Ахъушала районна Ахъушала шилизив.
ГIямарла Батирайла уличилси Даргала театр акIахъубхIейчивад илав гIярститли узули, илини хIялалси хIянчи бариб. Ереваньнизибси художественно-театральный институт таманбарибхIейчибад ХIясбуллагь ГIисаевли сунела гIямрула ва бузерила гьуни Даргала театрличил цIацIали бархбасахъунсири.
Иличил барх бузули калунти бархкьябани буруливан, ХIясбуллагь Ибрагьимовичли дебали чекайзурси, чебетаахъили, сунела хIянчи жавабкардешличил таманабирули вири. Илала бузериличи диги ва устадеш дагьардулхъули сари режиссерла санигIят бузахъухIелира. СагасилигIив умцIуси илини сунела санигIятлашалти пагьмурти гьар бархIиласи бузерилизир пайдаладирулри ва гIяхIти хIясилти чедиахъули, гьалавяхI вашулри. Илгъуна бетуц сабри режиссерла санигIятлизибра бекIлибиубси. ХIера, ХIясбуллагь ГIисаевли ахъси даражаличир гьаладихьиб К.Гальдонила «КIел хужаимла нукер», А.Загаловла «Сагадан Насруддин», И.Байгишиевла ва ХI.Наврузовла «ГIялибег Багъатиров» ва гIуррара гIяхIцад спектакльти. Илди чихъли кьиматладариб хIербиркIутанира хIукуматлира. ХI.ГIисаевла, «ГIялибег Багъатиров» бикIуси спектакль кабихьни багьандан, ХI.ЦIадасала уличилси республикала премияличи лайикьикибсири.
«Ил санигIят бузахъухIели, ХIясбуллагь Ибрагьимовичла бегIлара гIяхIти къиликъуни дагьардухъун – театрла гьарил адамличи пикри бяхIчииъни, илдала хIурматбирни, гьарилличи хъарти къллукъуни гIягIниси тяхIярли тамандирахъес тIалаббирни, кумекбарес гьалакдеш, гIяхIдешуни дарес хIемсни… гьайгьайрагу, илдала сияхIра даимбарес вирар», — гьанбиркахъули саби РФ-ла ва ДР-ла искусствобала урибси хIяракатчи, Даргала театрла режиссер Ибрагьимов Мустапа ГIябдиевичли.
Адам сегъуна саял хьарбаа илала мякьлаб бузутази, юлдаш-тянишунази бикIаргу. ХIера, Мустапа Ибрагьимовли урусигъуна сайри нушала белкIла авторра, адамдешла чихъти къиликъуначилси, санигIятлашал мурхьти багьудлумачилси. Иличила бурули саби цархIилти бархкьябала шалати гьанбикуназибра.
Буралли, ХIясбуллагь ГIисаевли цазаманализир кункдешличил дузахъи декIар-декIарти роланира: драмала дебали къиянси рольра илис халати устадешличил бузахъес имканбикIи, тяп, илкьяйдали – жамигIятлизир мискьилладирути къиликъуначилси дукелцIила (сатирала) гIяртистла рольра. Иличибли багьесли саби тIабигIятли сегъунти устадеш дедилил гьарли-марси гIяртистлис.
ХIясбуллагь Ибрагьимовичла пагьмулашалти къуллукъуни багьандан, 1981 ибил дуслизиб илис ДАССР-ла урибси гIяртистла хIурматла у бедлугули саби. Илкьяйдали ил лайикьикиб «Асилси бузери багьандан» медальличира, кьанниван – ДР-ла халкьла гIяртистла чихъси уличи.
ИшхIелла гIяртистунала наслулира илала сархибдешуни гьандиркахъули бирар, ва иличибад гIибрат касес сабира къайгънабиркьур.
Нушала ахIерси театрла тарихлизир мурхьти къел датурси ХIясбуллагь Ибрагьимовличила нушани сеналра хъумхIертехIе.
Салимат ХIяжиева, Р.ХIямзатовла уличилси республикала Миллатла библиотекала краеведческий отделла хIянчизар
