Сентябрьла 11-личиб Р.ХIям­за­товла уличилси Миллатла биб­лиотекала кон­ференц-заллизиб, ГIяхIмадхан Абу-Бакар акIубхIейчирад 95 дус дикниличил барх­басахъи, сагали дуракаибси «Даргала рурсби» бикIуси жузличил адамти тянишбарнила балбуц бетерхур.
Жуз «Даггосиздат»-ли жагали балкьаахъурли дуракаилри. Илизи «Даргала рурсби» ва «ДяхIила адамти» бикIути повестунира, писательла гIямрулизирадти суратунира кадерхахъурлири.
Балбуцлизир бутIакьяндеш дариб лугIурбала бетуц гьалабяхI башахънила, багьахънибала ва печатьла шайчивси министрла къуллукъуни дузахъуси Ю.ХIям­затовли, «Даггосиздат»-лис бекIдеш дируси А.ГIябдурашидовли, Кавказла писательтала клубла председатель, поэт, тилмаж, педагог М.Муслимовани, филологияла гIилмуртала доктор М.БяхIяммадовли, Дагъиста халкьла поэт А.ГIяб­дул­манаповани, «Дагестанский аул» музейла директор З.Сулайбановани, РАН-на ДФИЦ отделла заведующий Х.Юсуповли, писательла тухум Л.Изабакаровани, бекI редакторла къуллукъуни заманалис дузахъуси Р.БяхIяммадовла бекIдешлиуб «Замана» газетала редакцияла хIянчизарти, ГI.Абу-Бакарла пагьму дигахъути Дагъиста интеллигенцияла вакилтани, писательла тухумтани ва шантани, республикала СМИ-бала журналис­тунани.
Балбуц ибхьули гъайухъун лугIурбала бетуц гьалабяхI башахънила, багьахънибала ва печатьла шайчивси министрла къуллукъуни дузахъуси Ю.В.ХIямзатов.

«Сагаси хIянчиличив наб дургIети далагардешуни детхIеахъурли узес дигахъира. Нушала гьала тIашбизурси бекIлибиубси масъала миллатла мезани ахIерадарни саби. Ишдигъунти гьунибаънибазиб халаси мягIна лебси саби, хIуша ишар чедаэс наб дебали дигесли саби, хаслира художественное произведениела жузличил тянишдиъни бетурхухIели. Ил жуз даргала ва урус мезличил дурабухънили мез ахIерадарахъес нушаб кумекбирули саби. Наб виштIахIейчибад ГI.Абу-Бакарла пагьму тянишси саби. «Тайна рукописного корана» ва «Загадка кубачинского браслета» бикIути кинофильмаби дебали гIяхIдизуртири, илдала автор чи саял итхIели пикрихIевхъунси виасра. ГI.Абу-Бакар халаси кьадрила адам сайри. Нушаб букьурли баибси культура ахIерабарни республикалис гьуни чебиахъутала гьала тIашси бекI­либиубси масъала саби», — ви­кIулри Ю.ХIямзатов.
Чедиб гьанбушибти Дагъиста интеллигенцияла вакилтани ГI.Абу-Бакарла пагьмуличила чула пик­руми дуриб.
«Цаибил Дагъиста халкьла писатель Р.ХIямзатовла гъай тикрардаралли, «Дагъиста прозала савли», даргалацун ахIи, Дагъис­та, Россияла, дунъяла литературализи халаси пай кабихьибси, сунени делкIунти произведениеби дунъяла 60 дехI мезличи шурдатурси, СССР-лизир миллионтала тиражуначил жузи дурадухъунси, сунела произведениебала хьулчиличир 12 художественный фильм дуракаибси писатель, поэт, драматург, публицист ГIяхI­мадхан Абу-Бакаргъуна гIур цар­хIил чилра агара.
Амма, сунела пагьмуличил, миллатлара, Дагъистара литературализи, чеалкIуси наслу руркънилизи, патриот бяркъ бедлугнилизи, даргала мезра гIядатунира ахIерадарнилизи, Дагъиста челябкьла шаласи бетарахънилизи кабихьибси пайличи мешути хIурматра, чевяхIси прозаик гьаниркахъути далдуцунира гьанналис детурхули ахIен», — хIера, илди пик­руми дуриб лебилрара-сера балбуцличиб гъайбухъунтани.
Илди пикрумачил бархбасахъи, ДГУ-ла профессор, Дагъиста писательтала Союзла даргала секциялис бекIдеш дируси М.БяхIяммадовли дарес чараагарти далдуцуначила сунела пикруми гьаладихьиб: «Кьадармабиаб гьанна нуни дурути гIур лябкьуси юбилейличир тикрардарес, амма тикрардирес чевкъули саби, далдуцуни гъайлизир кавлули сари, баркьудиличи шурдулхъули ахIен. Гьанналис я МяхIячкъалализиб, я Кубачиб, я чинабалра ГI.Абу-Бакарлис тIашбатурси памятник агара.
Писательлис бегIлара халаси памятник саби илала произведениеби ахIерадарни. Дарган ва урус мезличил илини делкIунти лерилра произведениебала цалабяхъ (собрание сочинений), лерилра илала пагьмуличила дарибти белкIани дарган ва урус мезли дуракаъни, чараагарсилизи халбирулра.
Бахъ дигесли бири ГI.Абу-Ба­карла уличилси стипендия ка­­­бизахъес биалри, гIяхIти сар­хиб­дешуначил бучIути фи­ло­логияла факультетунала сту­ден­туни шабагъатлабирес ба­гьан­дан.
Лайикьли саби ДР-ла ГI.Абу-Бакарла ули­чилси пачалихъла литера­турала премия кабизахъес, сабира чердикIибти прозала про­изведениеби акIахъубти писательтас бедлугес багьандан.
Нуни гьаладихьибти масъулти гъайлизир кахIели гIям­ру­лизир детерхурли дига­хъира».
«Гьачам-биалра ГI.Абу-Ба­карла жуз някълизи касибсини ил адам мурхьдешлизивад дуравхъунси виъни иргъули саби, даршдусмала мурхьдешлизивад, дубурти-къадурбала мурхьдешлизивад, адамтала рухIла мурхьдешлизивад… Гьан­нара, сага-сагали илала жузи дучIухIели, илис лайикьси кьимат кахIе­ба­турли биъни аргъесли саби. Илини дигайличила, адамличибси чеблаличила, адамдешличила, вершадешличила лукIусири, кьяшмала удибси ванза арбякьунхIели секьяйда кьяшмачив калес гIягIнисил гIеббурусири», —рикIули сари жузлис гьалагъай делкIунси поэт, тилмаж, литературала критик М.Муслимова.
Балбуцличив гъайухъунси «Замана» газетала отделла редактор ХI.Ражабовли «Дар­гала рурс­би» бикIуси про­изведениелизиб­ти лебилра рурс­бала уми гьан­душиб. Или­ни повесть Москвализиб ду­ра­бухъунси «Роман га­зета»-ли­зибад белчIири. «Дагестанс­кая правда» газетализи ка­бя­хъили ГI.Абу-Бакарла ва ила­ла мякьла кабиибти рурс­ба­ла сурат чебаибхIели, 17 дус­ла гIям­руличив, илди рурс­би повестьла игитуни саби или пик­ри­барили, илди баргес ум­цIули калири.
Ну школализир ручIути дусмазир ГI.Абу-Бакарла повестуни дучIухIели, илабти иги­туни авторли пикрибарибти саби или гьанбиркуси ахIенри. Илди гьарли-марти, нушала мякьлаб хIербирути адамтиван чебиусири. Илала жузи дучIули, алавси дунъя аргъес наб гьамадбирулри. Илдигъунти, дунъя иргъахъути сихIру, бучIантани, гьаннара ГI.Абу-Бакарла жузазиб баргес бирар. Нуни жагьилтази жузи дучIахъес маслигIятбирулра.