Хайдакьла районнизивадси боксёр Ислам МяхIяммадовли 17-18 дусмала гIулухъаби-ургабси Европала гьалабдеш багьанданти абазаначиб арцла медаль сархиб. Илди абзани детерхуртири Сербияла Лозницализир. Дагъиста спортсменни 55 килограммличи бикайчиси битIакI хIясибли бутIакьяндеш дарибтири.
И.МяхIяммадов Родниковая бикIуси шилизивадси сай. Гьанна илини Дагъиста урибси тренер, республикала гIулухъабала цалабяхъибси командала халасигъуна тренер Марат ШихгIялиевла бекIдешлиур боксли виркьнила устадеш сари.
Абзанала ахирласи бутIаличи аркьуси гьунчир илини чумал ибкьти абз дурадеркIиб, илдазир илала хIял-тIабигIят ва сунела баркьудиличи халати диги чедиулри. Ахирласи абзлизиб илис кIиибил мер буцес имканбакIиб.
Хайдакьла районна бекIлира спортсмен мубараквариб: «Исламли челябкьлализир сархес вирути чедибдешунас сунела лерил секIал лерни чебаахъиб: тяхIяр-кьяйда дузахъни, хIял-тIабигIят, иштяхI. Европала гьалабдеш багьанданти абзаначиб сархибси арцла медаль – жагьил спортсменни чебаахъибси гIяхIси хIясил ва нушала Хайдакьла районнис пахрубирнилис сабаб саби. Иличив тIашхIейзурли, тренировкаби даимдарили, челябкьлализив бегIлара ахъси ганзухъличи ацIили дигулра. Илгъуна гъираличил абзлизи кархалли, мургьила медаль сархниличи бирхаудира леб».
Ил хIясил Ислам МяхIяммадовлис спортлизив гьалавяхI вашнила шайчиб мягIничебсили бетаур.