МяхIяммадов МяхIяммад Русланович учIули сай Усишала хIябъибил школала верхIъибил класслизив.

МяхIяммадли школализир ва районнизир детурхути конкурсуначир, олимпиадабачир мурталра бутIакьяндеш диру. Республикала кьадрила урус мезла ва литературала 28 ибил жагьилтала гIилмула  хIялумцIлабала «Шаг в будущее» бикIуси конференциялизир бутIакьяндеш дарили, гьалабси мерличи лайикьикиб.

МяхIяммад ункъли учIни багьандан ва школала гIямрулизир жигарла бутIакьяндеш дирни багьандан чуйнара ХIурматла Грамотабачил шабагъатлаварибси сай.

Спортла шайчирти абзаназирра МяхIяммадли гьаларти мерани дурцу.

Илини «Олимпийские надежды» бикIуси республикала мушулбашнила шайчирти абзаначир кIиибил мер буциб, мушулбашнила шайчирти «Дружба народов» бикIуси «Лига спортивных единоборств» клублизир детурхути абзаназивра цаибил мерличи лайикьикили, дипломличил шабагъатлавариб. Ил клублизир, Имам Шамил гьаниркахъули бетурхуси абзлизивра 2022 ибил дуслизив МяхIяммад хIябъибил мерличи лайикьикибсири.

2018 ибил дуслизиб Ахъушала районнизиб бетурхуси мушулбашнила чемпионатлизир бутIакьяндеш дарили, хIябъибил мер сархиб.

МяхIяммад МяхIяммадовли хIябъибил мер касиб Усишала шилизир бетерхурси ЧебяхIси Чедибдешлис багъишлабарибси, школабала бучIанти-ургаб дураберкIибси шашкабала абзлизиб, шахматунала абзаназирра гьаларти мерани дуциб. Ил спортла шайчирти, декIар-декIарти абзаназивра гьаларти мераначи лайикьиркули сай.

Илала сархибдешунас дедибти гIяхIцад дипломти ва ХIурматла Грамотабира лер.

Гьаннала гIергъира сунела гIямрулизир ва белчIудилизир сархибдешуни имцIадикIаб!

С.ГIябдуллаева