Ну «Замана» газетала редакциялизив узути цаибти дусми нушачи гIяхIли имцIали башули бири. ЦацахIели илдани газетализи кадяхъяхъес чула макьалабира дихули дири, цацахIели – иткъи, сегъуналра архIя хIебиалра.
Гьаниркур наб Дахадаевла районна ГIяштила шилизивадси Расул Балгъуев. ГIеларти дусми ил МяхIячкъалализив хIерирусири, ил багьандан урги нушачи имцIали вашусира.
Илала лерилрара-сера макьалабазиб гьанбуршуси бири сай акIубси ва вахъхIи хIерирули калунси ГIяштила ши. Бархьсира саби, ГIяштила ши сабри Расулла, бикIуливан, биштIаси ВатIан. Дебали дигахъи илис ГIяшти ва гIяштанти. Илаб сабри илини школа белчIунси. Илавад учIес вякьи, Сергокъалала педучилище таманаибси Расул сунела шилизив мугIяллимли узулира калун. Илис гIергъи цархIилти Дахадаевла районна сирхIяла шимазивра (Урагъила ва цархIилти школабазив) мугIяллимли узусири.
Расул Балгъуев «Правда» колхозла (ГIяштила ва Дирбагъла шими ила кадурхутири) хIяйвантала фермализив заведующийлира узули калунсири. Халаси пахруличил бурули вири илини чула колхозла итхIели, диштIати ва халати хIяйванти халдаралли, шел-урегал хIяйвантала ферма дирутири викIули. Илала дахъалгъунти макьалабазиб бекIлибиубси ца суал бири: «Чинара гьанна илди хIяйванти?» Илди агниличи ил дебали кьакьавикIули вири. Расул гьарли-марли хIукуматла масличи, сунела вегIдешлайчиван, уркIи изуси адам сайри.
Илис гIергъи гьануршисра нуни Кавказлизибра хабардерхурти ярагъла устнала шилизивадси ГIябдулмуъмин Зулпукьаров. ГIергъити дусмазив ил Каспийсклизив уршиличив хIерирули вири. Илинира, Расул Балгъуевливан, гьаланачиб Сергокъалала педучилище белчIунсири, гIур биалли — заочно ДГУ-ла филологический факультет. Гьаланачив ил мугIяллимли узули калун Дахадаевла районна Шулерчила шилизив, илис гIергъи —сай акIубси Хъярбукла шилизив. ГIябдулмуъминни абикьур халаси хъалибарг, илдази чучи лайикьси белчIудира касахъиб.
Сунела макьалабазир илини имцIали ахъдурцули дири мугIяллимла бузериличила масъулти.
Расул Балгъуевра ГIябдулмуъмин Зулпукьаровра цацахIели нушала редакциялизиб къаршибиркули бири. Гьачам нуни кIелра илдачила бархси макьалара балли белкIунсири. Иличи дебали разивиубси ГIябдулмуъминни наб кисалаб бихуси биштIаси хъярбукан дисра пешкешбарибсири. Нуни юлдашла савгъат гьаннара бихули лебал.
МяхIячкъалализи архIяличи яра шадив вакIибхIели, редакциялизи ваши Дахадаевла районна Гъуладтила шилизивадси ШяхI МяхIяммадсягIидовра. Кам-камли илинира лукIули вири сунела шиличила ва ши-алавти мер-мусаличила макьалаби.
Бускрила шилизивадси бахъал «Замана» газета бучIутани валуси пагьмукар мухбир БяхIяммад ХIябибуллаев, ну ишав узухIели, редакциялизи вакIили хIебалас. Амма илини мурталра почтализирад дурхьутири нушачи дахъал макьалаби. Дебали жагали лукIусири БяхIяммад.
Нуни ил даргала мезла мугIяллимванра валуси сай. Ну шилизив мугIяллимли узухIели, наб ил имцIали къаршивиркусири. Чуйнара къаршиикира ну илини кадирхьути дарган мезла ва литературала дурсрачивра. Гьарли-марли пагьмукар дарган мезла мугIяллим вирусири БяхIяммад ХIяжиевич. Халаси хIурматла адамра сайри ил.
Арбякьун итил дунъяличи илди мухбирти, Дахадаевла районнизибадти нушала газетала юлдашуни. Гьайгьайрагу, ЧевяхIсини илди, чула хIялалси гIямрула гьуни пикрилизи касили, Гьалжанала анхълизи хьурабарили биэс гIягIнили саби.
ЦацахIели хIянчилаб илди нушанира гIяхIти дугьбачил гьанбуршули дирехIе.

ХIяжимурад Ражабов