Ишди бурхIназиб «Замана» газетала редакцияла агьлу разибиахъуб ца гIяхIси хабарли. Мурталра вайтицун анцIбукьуначила баянтатани уркIби пашмандирахъути нушаб илгъуна разидеш пешкешбарибси Дахадаевла районна Меусишала шилизивадси машгьурси педагог ва писатель Расул БяхIяммадовла урши Муса Расуловичлис уркIи-уркIилабадси баркалла багьахъес лайикьли саби.
БяхIяммадов Муса Расулович ДГУ-ла филологияла факультетла деканна къуллукъличи катнили редакцияла хIянчизартицунра ахIи, даргала ва лебилра Дагъиста миллатунала вакилтира хIулбуркIахъу, сенахIенну ил пасихIси ва хIялалси адам сай.
Филологияла гIилмуртала доктор, ДГУ-ла Дагъиста мезанала кафедрала профессор, Россияла писательтала Союзла член, Дагъистан Республикала урибси мугIяллим, Дагъиста писательтала Союзла секретарь Муса Расуловичли дахъал дусмазиб дарган мезличи ва литератураличи жагьилтала диги акIахъес ва нешла мез гьаладяхI дашахъес багьандан чебетаибси хIянчи бирули сай. Ил бетуцлис бикьридеш дирули сари илини дураибти жузани, гIилмула хIянчурбани ва лугIилашал дахъал статьябани. Гьаннала гIергъира илини сунела бузери гьатIира чекайзурли дурабуркIниличи дирхехIе.
ХIурматла Муса Расулович, хIу пагьмучевси гIялим ва чекайзурси организатор сайни пикрилизи касили, хIечи игьдибар бихьили саби илдигъунти мягIничерти хIянчи дузахъес, гьачамлис хIу заманалис виадра къуллукъуначи катурси. Ил къуллукъличивра хIу лерилра хIела цIакьанира багьудлумира ибкьаили узниличи дирхулра ва мурталра хIу гьалавяхIцун вашули дигулра.
Илцадра разиси анцIбукьличил бархбаса­хъи, «Замана» газетала коллективли ур­кIи-ур­кIи­лавадли мубаракирулри, хIед ва хIе­ла хъалибарглис арадеш ва талихI диубли, хIян­чи­лизир гьарбизуни имцIадикIули, дахъал дус­мазив са­ни­гIятла ганзухъуначив ахъикIули, хIул­кIули хIе­ри­а­би!