Нушала замана футболла хIяз бархIиличи-бархIи машгьурбирули саби, цацабехIтас биалли, чула гIямрула бетуцли бетарули саби. СенкIун ил хIязли чи-дигара витIикIули сай. Ил нушаб разидешра саби.
Нушала шилизиб футболла хIяз дебали дигахъуси саби, ва чумилра абзличир, декIар-декIарти гьунибаънибачиб шила командабани гIяхIти хIясилти чедиахъутири. Сагати футболла майдунти дакIудиубхIели, хIязли биркьантала лугIи гьатIира имцIабиуб.
Нушала шилизибадти, чула шиличи ва шантачи уркIи изути, ил дебали дигахъути МяхIяммадсалам Ражабович Мажидовли ва Шамил МутIалимович Мажидовли халати-ургаб футболла шайчибси абз дураберкIес ибси пикри гьалабихьибсири. Савгъатра гIяхIси декIарбариб – 200 азир къуруш арцла. Илди хIякимти, яра футболистуни ахIен, илди хъулри лушнилизиб бузути гIядатла адамти саби. Илдала кьас сабри шилизибти адамтас байрам дураберкIес.
Абзлизир 12 кьукьяли бутIакьяндеш дариб: «Аликент», «Альянс», «Академия», «Аякс», «Динамо», «Инчхе», «Марокко», «МаслигIятла Юлдашуни», «Палестина», «Строители», «Учабулак» ва «Эталон».
Чемпионатла дурабад шила кубок багьанданси абзра дураберкIибсири. Илаб удибикибси футболла кьукья дурабулхъусири абзлизибад.
Абзани жумягIли кIина дурадуркIутири ва кIел баз духъяндитIунтири. Илкьяйдали шила дураб хIербирутази абзани чедаахъес багьандан «прямой эфирти» дурадуркIутири. Абзани детерхуртири Рабазан ШяхIбановла уличилси сагаси стадионничир. Ил гIямрулизивад жявли арякьун, амма сунела шилис ва футбол дигантас стадион барахъес дахъал хIянчи дарибси адам сайри. Чемпионат абхьиб нушала шила ветерантани, гьалабла футболистунани ва футбол дигантани. Илдани жагаси футбол чебаахъиб. Лерилра командаби чедибдеш сархес гьуцIлизирри, амма ахирлизи хIябал команда — «Палестина», «Эталон» ва «Альянс» дурадухъун.
Финаллизир къаршидикиб «Палестина» ва «Эталон». Илдала хIяз Дунъяла чидил-биалра абзличиб бетурхусиличи мешулири. ХIейгеси биалра, арадешлизиб нукьсандеш акIубли, илди командабала капитанти аги. Сен-биалра, хIяз дебали ункъли бетерхур. Чедибикес кIилисалра дигулри, ил багьандан кьукьни хатIа хIебарес къайгъилизирри. ХIера, хатIали чемпионра белгивариб: ахирлизиб «Эталонна» футболистунани чула къапулизи тап бархьаиб. Цаибил мер — «Палестина», кIиибил – «Эталон» ва хIябэсил мер «Альянс» командабас дикиб.
Чемпионатличил къяйли таманбиуб шила Кубок багьанданси абзра. Финаллизир «МаслигIятла Юлдашуни» ва «Инчхе» командаби къаршидикиб. 6:2 хIясибли цаибси командали чедибдеш сархиб.
«Палестина» ва «МаслигIятла Юлдашуни» сари-ургар Суперкубок багьандан гьунидаиб. Футболлис чебаахъибси бекIлибиубси заманализиб чедивикибси белгиварес хIебиуб. Счет 1:1 сабри. Дарибти пенальтибазиб «МаслигIятла Юлдашуни» цIакьли уббухъун. Камил НухIовли хIядурбируси командали кIиибил Кубокра сархиб. Тамаша ахIену, Чемпионатла абзлизиб ил командали бегIла гIергъиси мер сархибсири, амма сунела хIязтани биркьанти барсбарили, кубокличиб чедибдеш сархиб ва Чемпионатла цаибил мер сархибси командара удибикахъиб.
Чедидикибти командабас кубокуни, грамотаби, премияби ва медальти дедибтири.
БегIлара гIяхIси вратарьлизи халвариб «Палестина» командала вратарь Муса ГIябдуллаев.
ГIяхIси защитниклизи – СултIанбек Ражабов («Эталон»).
ГIяхIси полузащитник – Шамил ХIясабяхIяммаев («Палестина»).
ГIяхIси чеулхъан (нападающий) – Руслан Ражабов («Эталон»). Илини гIяхIси кумекчи (ассистент) ибси ура сархиб.
ГIяхIси бомбардир – Ризван Юнусов «Инчхе» командализивадси.
ГIяхIси тренерлизи халвариб «Палестина» командала тренер Ражабкьадиев Рабазан МяхIяммадович. Чемпионатла бегIлара гIяхIси футболистлизи халвариб «Палестина» командала футболист Сулайбан Сулайбанов.
БегIлара дурхъаси (ценный игрок Чемпионата) футболистлизи халвариб «МаслигIятла Юлдашуни» командала вратарь, жагьси спортсмен Рабазан БисултIанов.
Ахирлизиб баркалла багьахъес дигулра Первомайскла халкьлис, байрамли бетаурси баркьуди дураберкIахъес кумекбарибти лебилра адамтас. Арцла шайчиб кумекбарибти МяхIяммадсалам ва Шамил Мажидовхъалас. Ил Чемпионат дураберкIибси сиптакар Сулайбан Сулайбановлис, арбитрти Руслан Мажидовлис, Кьурбан МуртазагIялиевлис, Кьурбан ГIябдулмажидовлис ва ХIябиб ГIяхIмадовлис.
Рабазан Рабазанов
