Сергокъалала районна ХIур­хъила шилизибси культурала ва бамсриихънила Центрла филиал­ли­зиб СВО-ла бутIакьянчи МяхIяммад ГIи­саев­­личил гьунибаъни бетерхур.
Балбуц ибхьули, Нариман Идзиевли цалабикибтас саламла дугьби дуриб ва МяхIяммад ГIисаевлис баркалла багьахъур, камси заманалис отпускличи хъули вакIниличи хIерхIеили, гьунибаънилизир бутIакьяндеш даресра замана баргнилис. Илини илдигъунти гьунибаънибала мягIничебдешличила аргъахъиб, чулара кумекличил дявила къуллукъуни тамандирути нушала бургъантачила имцIаливан багьахъес имканбикIахъути.
МяхIяммад ГIисаев СВО бетурхуси мер-мусаличив сай ил бехIбихьибти цаибти бурхIначивадал. Дявила къуллукъуни тамандирухIели, ил декIли вяхъибсири. Артиллерияла хIярхIубала цIа чекьурли гIергъи, сунела полклизивад мицIирли калунси ца илцун сайри. МяхIяммад дус арадеш къулайбирули калун.
Гьунибаънила дазурбазир, цалабикибтани илизи дявила хасси балбуц бетурхуси мер-мусаличирти аги-кьяйдаличила хьархъардяхъиб, аргъбаибти масъултала черкад суалти дедиб. МяхIяммад ГIисаевли дявила къуллукъуначил дархдасунти цацадехIти анцIбукьуначила буриб.
Ахирличиб Нариман Идзиевли, гъабзадеш дакIудирни багьандан, ургъаннис уркIи-уркIилабад баркалла багьахъур ва савгъат пешкешбариб.