Чи-ди­гара тамашаирахъути адам­ти хIербирули саби Да­гъиста дубуртала мер-мусаличиб. Уму­си гьава гьигьбирули ва шараб-шин­ни­цун бужули ахIен дубур­лантани ду­хъянти гIямру дур­кIути, жигарчебли вяш­бикIули, та­машала кункдешличил илдани даршдусла дазу ихъули саби. Селизиб саби илгъуна анцI­букьла дигIяндеш?
Дагъистанлантани даршал дусла дазу ихънила хьулчили бетарули са­би арати гIямру дуркIни. Илар тIа­би­гIят­ли­чил цIацIали дархдасун­ти минала гIя­датуни мяхIкамли ди­хIули сари. Гьар бархIи хъуми-унхъ­разиб бузули, гIемс­нала бузери жигар­чеббирахъули кьаркьала къулайси агиличиб бихIули саби. Чи­налра гьа­лакхIебикIули, паргъатли хIер­­бир­ни илдас дебали мягIничебси саби, се­на­хIенну паргъатдешли нерва­бала ибкь­дешлизи хIеркахъу ва хIял-тIа­би­гIятлашалси арадеш дебабирахъу.
Беркала букнила тяхIяр-кьяй­да­личира пикри бяхIчихIеэс хIейрар. ГIя­датла дубурланна кьумур зярхIти цIедешли ва овощунани, ниъла ва ризкьила продуктунани бицIибси саби. Чула някъбани ванзаличибад бакIахъибси сабухъ саби шимазибти адамтани пайдалабируси, шагьуртазиб хIербирутаниван заралласи беркала ахIенну букуси. Дубурлантани шимала мер-мусаличирад дашути дарма кьар имцIали дузахъу, сенахIенну илди изайс сабабдирути сари.
Буралли, дубурлантала гIям­ру­личи пикруми-хIеранани декIарси мер бурцули саби. Илдани дурхъати гIя­датунала халаси хIурмат бируси саби. ГIяхIличи бирхауди, гIямру ди­гахъни саби илдала кьаркьала ва рухIла арадеш гIердурцути бегIлара гIяхIти «витаминти». Цадеш, адамтала гьалар жавабкардеш дихни, цали ца гIеббурцни – духъянти ва талихIчерти гIям­ру дуркIнила деба­си хьулчи саби.