Ахъушала шилизибси культурала КIялгIялизиб ишдуслизиб августла ахирличиб дурабуркIуси мугIяллимтала конференцияличиб, гьар мурталра кьяйдали, дахъал дусмазиб хIялалси хIянчи барибти, чули касибси санигIятлис марти ва ахъси даражаличиб чучи хъарси хIянчи даимбирути бахъал педагогуни «Ахъушала район» МО-ла администрацияла бекIла шайзибад ХIурматла Грамотабачил шабагъатлабариб.
Илди-ургар лерри ГIялиханмахьилизирадси хIурматла мугIяллим ХIяжиева Мариям ХIяжигIялиевнара.
Мариям ХIяжиева акIубси сари хIурматла, хъалибарглизир. Мариямла дудеш ХIяжигIяли Сай­пу­ди­новра дахъал дус­ма­зив школализив мугIял­лим­ли узули калунсири, неш Саният медсестрали рузиб. Мариямли сунела дудешла дякь­кад рашули, мугIяллимла бу­зерила гьуни даимбирули сари.
ХIяжигIялини ва Саниятли шел урши-рурси абикьур, гIяхIси бяркъра бедили, чебяхIси даражала багьудира касахъили, гIямрула гьунчи дураиб.
Мариям ХIяжиева ГIялиханмахьилизибси урга даражала школа белчIи гIергъи МяхIячкъалализибси Дагъиста пачалихъла университетла филологияла факультетлизи карерхурсири. ГIяхIти кьиматуначил ручIуси Мариям ХIяжиевани университет хIунтIена дипломличил таманбариб. Ил урус мезла ва литературала мугIяллимла санигIятличи регIриуб. Гьанна ГIялиханмахьила урга даражала школализиб Мариям ХIяжигIялиевнани чебетаахъили, сунечи хъарси хIянчи бирули 24 дус рузули сари.
ДурхIначи дигичерси, малхIямси, гIяхIти уркIи-хIялла регI Мариям ХIяжигIялиевнани бучIантази багьуди касахъес, сунени кадирхьути дурсрачи иштяхI ва диги акIахъес гIяхIцад къайгъни дакIудирули сари. Сунечил барх бузутала ва шила халкьла хIурматра сархили хIеррирули сари ил.
Мариям ХIяжигIялиевна чумал ахъси даражала шабагъатуначи лайикьрикиб: «РФ-ла хIурматла хIянчизар» ибси уличи, «ЧебяхIси даражала категория»-личи, районна администрацияла шайзирад ХIурматла Грамоталичи.
М.ХIяжиевани сунела гIямрула вархкьячил авал урши-рурси леб абилкьули. Мариямла кIел рурси Дагъиста пачалихъла педагогический институтлизиб бучIули, чула нешлагъуна санигIятличи бегIбиэс дигули саби.
Мариям ХIяжиевала ца узи МяхIяммад ХIяжигIялиевич ГIялиханмахьила урга даражала школализив, коллективла ва шила халкьла ургаб хIурматра сархили, директорли узули сай.
Гьаннала гIергъира хIурматла мугIяллим Мариямла гIямрулизир ва бузерилизир сархибдешуни имцIадикIаб. Сунела дигутани разирирули хIерриэс кьадарбиаб!