Бархьли бурасли, чумал дус гьалаб МяхIячкъала, дуцIрумла мазиллизиб, Сочиличи хIебиалра, сегъуна-биалра сакIубси курортла шагьарличи мешубиркни нушаб гьанра хIебирки. Гьалаб июль баз буцIардешли лагьбикIуси, шагьарланти чула хъулрази дигIянбикибси яра хала бегIтачи шимази арбашуси замана бири. Гьанна анцIбукь ургIебли саби. ХIянчиличи яра шадибгьуни дураберкIес бархIехъ дуравхъалли, нушала тах шагьар улкала гьар мерличибад бакIибти гIяхIлани бицIили чебиур.
Сапарчибала варача «дай уркIилизир» рузуси нуни илди тяхIяр-кьяйда духIнарад чедиулра. Жура-журала сапарчиби леб. БиштIаси рестораннизи бухIнабухъи, тамашабирутира леб. Илди нушала хурегуначи, архитектураличи, цархIилтазибад бакьибси дубурлантала гIяхIялдешличи хIяйранбирули саби. ГIяхIлас нушала Дагъистан – дусла сагадеш, тамашала анцIбукьуни ва жагати дубурти саби.
Гьайгьайрагу, сапарчибала варачай къияндешунира кадухиб – МяхIячкъалализиб бархибдешла аги кабизур. Мерличир хIеррируси адам сарливан, «дила» паргъатси МяхIячкъалаличи карцIриублира. ВегIлис дигуси заведениелизиб мурталра акьуси стол бируси, берклумала сияхIлизир багьни ахъхIедикIуси ва гьундурачир цархIилти шагьуртала номертачилти ахирагарти машинаби учихIедиркуси замана гIяхIси бири.
Культурабачил тянишдиъни бегIлара чебетаибси тема саби. Нуша, дагъистанланти, къугъати гIяхIялдеш дирути адамти сарра. Ил нушала хIилизиб саби. Нушани илкьяйдали дурхъати гIядатуналара пикруми-бетуцуналара хIурматбируси саби. Саби гIяхIладли бакIниличила хъумартурли, инсап-хIяя агарли вяшбикIути адамтани децIигахъули бирар. Бахъалгъунти сапарчиби нушала дресс-код бузахъес къайгъилизиб бирар, дубурлантала гIядатунала хIурматбирули. ХIера, ил саби «бархьси» туризм.
Туризмли нушала куц-кабиз гIяхIцадла дарсдариб. МяхIячкъала гьалабяхI башес бехIбихьиб, дахъал тамашала мер-муса ва къуллукъ гIеббиахъути хIянчизарти дакIудиуб. Нуша халаси дунъяла бутIали детаурлира, иличил бархли нушачи хасти къиликъуни детхIехъахъес къайгъибирули.
Дагъистайзиб тарихла манзил бетурхули саби. Нуша машгьурдиублира. Нушала нушани дубурти ва урхьу мяхIкамли дихIяхIелли, республикализи башути гIяхIланира чус пешкешбируси ванадеш кьиматлабиру. Илгъуна сапарчибала «варачан» нушаб хайричебсили бетарар. Ахирличиб, сапарчиби ванадешла, разидешла ва азаддешла хIяланани бицIили, чула мер-мусаличи чарбулхъан.