Кьаркьа къулайси аги ва гIякьлу-дагьрила даража цаличил ца цIацIали дархдасунти бутIни сари. Кьаркьала ва адамла хIял-тIабигIят цализирад ца декIарли диэс дирути ахIен: нервабала ибкьдешли иза чехIейсудеш хIярхIбирахъу, кьаркьала излумани буцалли, уркIила гьавличи ва мехIеличи асарбиру.
Кьаркьала къулайси агиличиб калахъес багьандан, вакцинацун барахъни баибси ахIен, белгити тяхIяр-кьяйдара дузахъес чебиркур. Кьаркьа аги гIеббурцути бетуцуначирад вехIирхьуси сай: гьанкI ихъни, гIемс­ни дузахъни, пайдаласи беркала букни. Илди гьа­мадти тяхIяр-кьяйдали уркIила-тумала ва чакарла из­луми детхIеахъес кумекбиру, илкьяйдали гьавла агира гIяхIбулхъахъу. Адамли сунела хIял-тIабигIятла арадешличила иргънира дебали мягIничебси саби — кьаркьай саби бамсни иргъахъуси саби, илхIели чараагарли бамсриихъес чебиркур. Лишанти иргъ­нили, пайдаагарти багьахъниби камдарнили пик­риикI­нила даража саркъибсили калахъес икьала­би­ру.
Излумазивад мяхIкамикIнила далдуцуни асар­черли дузар илди гьар бархIила гIямрулизир пай­да­­ладиралли. Хапли дарсдиубти низам-кьяйдали ха­ласи гьунар дурахIейу. Даим шадибгьуни дура­бур­кIеная, хьурали дашеная, упражнениеби диреная. За­маналичир излуми белгидарес ва илди сагъдарес тух­туртачи дугьадилзеная.
ВегIличила къайгъни гIямру духъян­дирахъуси ва се­гъунти-дигара къияндешунас къаршидеш дарес им­канбикIахъуси баркьуди са­би. ХIушала арадеш­ли­чи чедихIяртдеш дакIу­ма­диридая.

ПатIимат Мирзаева