ХIушани балуливан, Россияла Президент Владимир Путинни «2023 ибил дус — педагогла ва насихIятчила дус» сабливан багьахъурсири.
Дила пикрили, ил нушала мугIяллимтас баркаллала дугьби дурес багьандан, дебали гIяхIси имкан саби. СенахIенну нушала биштIати илдани руркъули саби ва илди
чула халкьлис багалатили бетарахънилизи пай кабирхьули саби.
Россияла Федерацияла багьудлуми тIинтIдирнила шайчибси академияли биалли, сунела шайзибад мугIяллимти гIеббурцули саби. Академияли педагогла санигIятла даража чеахъбарес ва жагьилти адамти ила битIакIес багьандан, лерилра хIяжатти хIянчурби дурадуркIули сари. МугIяллимла санигIятли халкьла гIямру гьаладяхI дашахънила шайчиб бекIлибиубси мер бурцули саби. Нуша, диштIахIейчирад дехIдихьили, гIямру деркIайчи багьудлумачил дегIдирутира. Гьарил адамла гIямрула мурадра сай-вегIси багьудлумала урунж чебирцIахъни саби.
Зубайдат МяхIяммад-Иминовнала гIямрура багьудлумачил дархдасунти сари. Зубайдат Рабазанова Дахадаевла районна ЧIишилила урга даражала школализир математикала учительница сари.
Илини 1994 ибил дуслизиб Дагъиста пачалихъла университетлизиб математикала факультет таманбарибсири. БелчIуди таманбарили гIергъи, сари акIубси шилизи чаррухъун ва учительницали рузес рехIрихьиб. Илкьяйда бехIбихьибсири Зубайдат МяхIяммад-Иминовнала мугIяллимла гIямрула гьуни.
Гьанна ил школализир рузули, дурхIни багьдулумачил ва бяркъличил бегIбирули, 30-йчирра имцIали дус риубли сари. Гьайгьайрагу, Зубайдат МяхIяммад-Иминовнала бучIантани республикализир дурадуркIути математикала шайчирти олимпиадабачир, конкурсуначир бутIакьяндеш дирули сари ва илар чедибдеш, гьаларти мерани сарху.
Зубайдат Рабазанованира мурталра илдигъунти далдуцуначир бутIакьяндеш диру. Мисаллис, илини 2023 ибил дуслизиб лебил Россияла «Навигатор детства 3.0» бикIуси конкурсличиб чедибдеш сархиб. Илкьяйдали, «Билет в будущее» бикIуси проектлизир бутIакьяндеш дарни багьандан, ил Дагъистан Республикала Багьудила Министерстволира шабагъатларариб.
Илала дурарад, Зубайдат МяхIяммад-Иминовна учительла бузерила ветеран, Россияла Федерацияла Багьудила хIурматла хIянчизар сари.
Илкьяйдали ишдус, Зубайдат МяхIяммад-Иминовнас «Отличник Образования Республики Дагестан » бикIуси у ва михъирличи биршуси лишан бедиб.
Нушани Зубайдат МяхIяммад-Иминовнас сунела гIямрулизир гIуррара сархибдешуни дулгулра!
