ХIера, гьанна гъамли белчIудила сагаси дус бехIбирхьули саби. ГьархIели школала бучIантира илдас багьудлумала гьарзаси дякь ибхьули бузути мугIяллимтира иличи хIерли бирар. Гьайгьайрагу, гьарилла уркIилизиб ишдус арбякьунси дусличиб сабухъчебсили бетарниличи бирхаудира бирар.
Амма, дусличи-дус белчIудиличи гъирачебти бучIанти камбикIули саби. Мурхьти багьудлуми касес сецад-дигара къулайти шуртIри лерли диалра, илдала иштяхI гьачамичиб-гьачам камбикIули саби. Селизиб сабира сабаб? МугIяллимтани, ишхIелла тIалабуначи далдикибти гIягIниахълуми пайдаладирули, бирусигъуна хIянчи барили, дурсри бучIантас дигестили детаахъес къайгъи дакIубирули саби. Гьайгьайрагу, ил хIянчила гIяхIти хIясилти сарливан, белчIудилизиб гьалабяхI башутира, олимпиадаби-конкурсуначир сархибдешуни дирахъутира дурхIни леб. Биалра, бахъалгъунтас бучIес дигули ахIен. Дила пикрили, илдала белчIудиличи иштяхI камбирахънила бекIлибиубси сабабли детарули сари гьаннала заманала гаджетуни. Интернетла кумекличил дурхIнани дурсрачир багаладиэсти гIяхIцад насихIятунира дургули хьалли, дахъалгъунти анцIбукьуназир, илаб биштIатала халаси замана харжбирути, гIямрулизиб пайдалабиэси селра-декIар маслигIятхIебирути хIязани ва программаби сари. Илдази «бухIнакабикалли», биштIатас цархIил баркьудилизи ахъес сеналра дигули ахIен.
Ил багьандан мугIяллимтани ва бегIтани къайгъибирес гIягI­нили саби дурхIяла багьудиличи иштяхI чарбухъахъес, замана каби­захъурлицун гаджет някълизи бедлугес. УргIебли илди сегъунтилра багьудлуми агарли, вайнукьабала «душилизи» бикили кавлан. ГьатIиралра гIяхIси, дурхIяла акьуси замана лебли биалли, илизир спортличи диги адикьес. Спортли ва белчIудилицун виштIаси арати гIямру дуркIнила бетуцлизивра дагьрилизивра гьалавяхI арку.