Россияла урибси художник, Дагъиста халкьла художник Мухтар Къамбулатовлис Хайдакьла районна бекI Запир ХIясановла шайзибад Баркаллала кагъар бедиб. Шабагъат бедлугнила балбуц бетерхур «Дагъиста ши» музей-заповедниклизиб устала пагьмулис хасбарибси выставкала дазурбазиб.
Районна бекIла шайзибадси шабагъат бедиб Хайдакьла районна администрацияла вакил ГIяхIмад Сулайбановли. Баркаллала кагъар бучIули, илини Мухтар Къамбулатовли Дагъиста культура ва искусство гьаладяхI дашахънилизи, миллатла гIядатуни мяхIкамдирнилизи халаси пай кабирхьниличила буриб: «ХIела пагьму – чихъти устадеш сари, суненира нушала крайла рухIла давла мяхIкамли бихIес хIяжатли биъни сипатбируси. Ил давла хIуни сагаси наслуличира биахъулри. ХIед чIумаси арадеш, гьатIира халати сархибдешуни дулгулра». Илди дугьбачил илини художниклизи халкьла искусствола хIянчи – хайдакьла някьишли белкIунси чIянкIи пешкешбариб.
Мухтар Къамбулатовличила, тарихла живописьла уста сайливан, лебтанилра балуси саби. Илала халати хIянчурби Кавказла дергълис ва Дагъиста бекIлидиубти анцIбукьунас хасдарибти сари. БегIлара машгьурти хIянчурби-ургар леб «1741 ибил дуслизиб Надир-шагьла гIяскарличилси хайдакьлантала дергъ» бикIуси суратра, сабира санигIятлашалси цалабяхъла чихъси кьиматличи лайикьбикибси.
Дудешличил дарх илини гIяхIцад суратуни далкьаахъур. Илди гьанна ГI.Тахо-Годила уличилси ДР-ла Миллатла музейла даимси экспозициялизир гьаладихьили сари.
Мухтар Къамбулатовли хъалибаргла художестволашалти гIядатуни даимдирули сай. Илини В.И.Суриковла уличилси Москвала пачалихъла академический художественный институтлизиб В.Н.Забелинна устахана хъараахъур. Сунела творчестволизив художник урусла академический школала гIядатуначи хъарихъули сай, илди Дагъиста искусствола лишантачил жагали дархдалсахъули. Тарихлашалси темала дурарад, илини тIабигIятла суратуни, портретуни, натюрмортуни далкьарахъули вирар.
«Дагъиста ши» музейлизиб экспозиция абхьнили художникла творчестволичил гьатIира имцIали адамти тянишбарес гIяхIти имканти гьаргдиахъуб.