ГIямрулизиб бегIлара дурхъаси ва мягIничебси далилли бетарули саби хъалибарг. Хъалибарг ибси дев бакьибхIели, гьалаб-гьалаб нушаб бегIти гьанбиркур. Сен? СенахIенну, гьарил адамла гIямрулизиб цаэсил мер бурцуси саби бегIтани. БегIтани сай дурхIя гIямруличил тянишвируси.
Гьарил адамла рухIла кабиз, хIял-тIабигIят, хасиятуни, бяркъ хъалибарглизир лушути сари.
ВатIан, нешла мез, улка дигахъес, биштIатала ва халатала хIурматбирахъес, цархIилтачи уркIецIибирахъес виштIахIейчивад бурсиварибси дурхIя, цархIилтазивад декIарулхъан. Сахаватдеш, диги, хIурмат дузахъуси хъалибарглизиб халабаибти дурхIни жамигIятлизиб мер буцибтили халабиур.
Адамдешла къиликъуни дуунти, хасти тяхIяр-кьяйда хIедузахъути хъалибаргуназиб халабаибти дурхIни, селичилра игьдибар агартили, васваскабикIутили бетарар. Или хIебиахъес, халатани къайгъибарес хIяжатли саби. ДурхIнас бегIтани бархьси гIибрат чебиахъес гIягIниси саби.