Сергокъалала районнизиб бахъал бузерила зяхIматчиби леб.  Сунечи хъарси хIянчи чебетаахъили бируси, дуги-хIери хIеили узуси, хIялалси бузериличил халаси хъалибарг абикьурси, Бурдекила шилизивадси ГIябдулхIяпиз ГIябдусаламовличила саби наб иш макьалализиб бурес дигусира.

1970 ибил дуслизиб ГIябдулхIяпиз ГIябдусаламовли МяхIячкъалализибси Дагъиста политехнический техникум  таманбариб.  Ил дахъал дусмазив набтла буругъуназив узули калун. ГIябдулхIяпизли газла ва набтла буругъунала тIярхъибачи хIеруди бузахъуси устала санигIятра ункъли бяркъур. Илини Южно-Сухокумсклизирти ва Туркменияла Мари шагьарлизирти  буругъуназирра гIяхIцад хIянчи дариб.

 «Ца балусини лерил дала» — бикIуси бурала лебси саби. Ил бурала ГIябдулхIяпиз ГIябдусаламовличи хIекьли балбикили саби. Пенсияличи арукьяйчи ил Казахстайзив лацла устали узули калунсири.

Пачалихълира ГIябдулхIяпизла бузери пикрила дураб хIебатур. Илала дахъал орденти, медальти ва Баркаллала кагъурти лер.

Бируси хIянчилизив серхурси, спортлизив сунела зилантас гIелахIелхъуси ГI.ГIябдусаламов пенсияла дусмачивра акьули уули ахIен, ил Бурдекила шила халатала Советла председатель сай.  ГIябдулхIяпизли газетализи макьалабира лукIули вирар . Сунени дусмадли газетабазирад, журналтазирад гIяхIдизурли дучибти баянти чедаахъили нушара тамашадарира.

ГIябдулхIяпизли ва ПатIиматли шел урши-рурси абикьур, илдас гIяхIси бяркъ бедиб ва гIямрула дякьличи дураиб. ДурхIнала дурхIначил арати , разити духъянти гIямру дулгулра илдас.

Набтла  буругъуназир

Дахъал хIянчи дарибси,

ХIулбани чебаибси

Някъба мицIирбируси.

 

Баркаллала  кагъурта

Хъа бяхIяни дуцибси,

ХIянчи агарли хIевэс

Гьаннара къайгъназивси.

 

Ордентани варшибси

Бузерила зяхIматчи,

Шелра урши-рурсилис

ПасихIкар насихIятчи.

 

Бурдекан ГIябдулхIяпиз,

ТIинтIбикIаб хIела наслу,

Шантанира хIунира

Биресли чучи пахру.

 

Адамдеш ахъли дихул

Сабур-яхIла дубурлан,

Калаби ара-сагъли,

ГIябдулхIяпиз бурдекан.

Басират ХIяжимурадова