ИшбархIи улкализирти тяхIяр-кьяйда лебтанилра далули сари. Балулра, чумра цIуръабиъни, чумра хьунул хъуливси къакъбяхъ агарли кални, бегIтала уркIби цIяб дуги гъагултани бацван дуцни. Амма се гIяхIдеша, бареси агара… Нушала хала бегIтани дяхIяурти, чекасибти къияндешунира гьачамлис хъумартурли ахIенра.
Наб газета бучIанти ГIяликьадиев МяхIяммадрасул МяхIяммадовичличил тянишбарес дигулра. Ил Дахадаевла районна Кудагула шилизив 1978 ибил дуслизив акIубси сай. Илала хIябал дурхIя леб: ца уршира, кIел рурсира. Илала хъалибарг Кудагула шилизиб хIербирутири. Улкала бачабархибдеш бархIиличи-бархIи имцIабикIулри. ХIера, 2023 ибил дусла сентябрьла 18-личив МяхIяммадрасул сай гIяхIъулали вягIда бигьи, ВатIа хъархIерагардеш батахъес арякьун. Ил кьяшлизивад вяхъиб ва госпитальлизи викиб. ГIур хъули вархьиб. Арадешра къулайбарили сайра ил сагадан СВО бетурхуси мер-мусаличи арякьун. Май базла бехIбихьудлизив ил гьатIира декIли вяхъибсири. Ил багьандан июльла 15-личи бикайчи илис отпуск бедибсири. Отпускра хъулиб беркIили, бара сагъвиубси МяхIяммадрасул Ростовлизи арякьун, илавад — Бахмутлизи. Илавад чарухъес пикри аги илала. ЯхI-ламусчевси дубурлан гъабзас сунечил бургъути бархкьяби бархьбатес дигули ахIенри, илдас кумекбарес, цIализибад берцахъес къайгъилизиври. Чедаахъибти гъабзадеш багьандан «Кудагу» бикIуси позывной уличилси МяхIяммадрасул кIел мургьила медальличил шабагъатлавариб.
Июльла 19-личив рядовой И.ГIяликьадиев бегIла гIергъи телефоннизивад гъайухъунсири. ГIур МяхIяммадрасуйчирад сегъунтилра зянкъ дакIили ахIен. Бархкьябани бурни хIясибли, ил сунела кьукьялизивад цархIил кьукьялизи шурватурсири ва Клещеевкализи, дергъ бемжурси мерличи вархьибсири. Иличил вархси урус дурхIяли МяхIяммадрасул вяхъили чеили сай, гIур ил чина викибал чилилра балуси агара. Июльла 20-личивад ил къел-хIерзи агарли веткахъибсилизи халварили сай. Илкьяйда биаллира, гIяхIдешличи вирхес гIягIниси саби. ЧIянкIли Аллагьли ахъри габ гьар секIал дяхIяахъес. Сен-биалра, МяхIяммадрасул ГIяликьадиев нушала игит сай, игитуни саби сунечилти бархтира. Къиян чебакIибхIели, кумекла някъ гьабалтутачила нушани хъумартес асухIебирар. Илдачила гъайдикIес, лукIес нушала чебла саби. Улкала игитуначила лебил дунъяли багьес гIягIниси саби. ВатIайс марти гIяхIгъубзни лебалцадхIи, челябкьлаличи бирхаудира бетхIейхъур.
Анжела Мутазова
