Адамтала гIямрулизир сегъунти-дигара анцIбукьуни кадиркули дирар: бехIемцIуни ва мусибатуни, машинабала авариялизи биркули ва дяхъи-хъаслабирули. Илдигъунти адамтала арадеш нукьсанбикалли ва някъ-кьяш агарли калалли, хIербиэс дебали къиянбулхъули саби, хаслира цархIил адамла кумек агарли шикьбикIес. Амма цацабехIтачи пахру хIебарес хIейрар. Илдани ара-сагъти адамтани хIедирути гьунартира дархли дирули сари. Илди саби спортлизи ахъибти адамти, чула биркIанти агарли хьалли.
Чисалра дигIяндеш ахIен гьаннала замана арадешлизиб нукьсандеш лебти адамти имцIабикIни. Илдас сабаб — Украинализиб бетурхуси дявила хасси балбуц. Илдигъунти адамтас спортли кумекбирули саби чула цIакь чебаахъес, кьасани ва хьулани детерхахъес ва иличил барх саби ара-сагъти адамтазибад гьунартачил ва сархибдешуначил илцад-декIар декIархIебулхъни марбарахъес.
Кьяш яра някъ агарти адамтас спортлизи ахъес гьамадси ахIен. Ил шайчибси хасси спорт пикрибарибси саби халкьани-ургабси чулахъунала спортла организацияли. Кьаркьайзиб чулахъдеш лебти адамтани спортличи иштяхI лебли биалли, гьаланачи медицинала шайчибси ахтарди дурабуркIу, тренировкабачи башар, гIур биалли абзаначира бархли. Гьарилтас спортла декIар-декIарти жураби гIяхIдилзули дирар, яра чулахъдеш бетаайчи чули бузахъуси спортла журализиб биркьес дигахъу.
Нушала республикализирра лер илдигъунти адамтас спортла хIязани ва абзани: теннис, футбол, шашкаби (хIулбазиб нукьсандеш лебтас) ва цархIилтира. ИмцIаливан футболли биркьути бахъал саби. Республикализир илдигъунти спортсментала чумал команда лерти сари, илдани «Лига героев», «Кубок Победы», «Стальная воля» ва цархIилтира абзаначиб чедибдеш сархиб. БегIлара вахъхIи футболли виркьуси, 1991 ибил дусличивад, Дагъиста командала ветеран дагъистанлан Тимур ГIялиев сай. Ил дунъяла шуйна чемпион Россияла сборнаялизи кархуси сай, ва гьанна Дагъиста командализив абзикIули сай.
Гьайгьайрагу, арадешлизиб нукьсандеш лебни дебали хIейгеси анцIбукь саби, амма илдигъунти адамтани чус лайикьси спортла жура баргили абзбикIниличи пахру хIебарес хIейрар. Хаслира дявила хасси балбуцлизибад декIти дяхъурбала гIергъи чулахъдешличил чарбухъунти бургъанти, адамти-ургар чула гIямру даимдирули спортлизиб биркьни дебали дигеси анцIбукь саби. Дила пикрили, илдани дявила майдайчир дарибти гьунартаниван даршути гIямрулизирра нуша чуйнара тамашадирура. Илдас чIумаси арадеш ва халаси сабур булгехIе!  

Наида Гъуруева