Гьаларван Ахъушала районна Ахъушала ши­­лизир Дагъиста спорт­­ла урибси ветеран, сунечила ул­ка­лизирра хабардерхурси спортсмен БяхIямма Айгубовла хIур­­­­матлис дуцIла шайчирти аб­за­ни детерхур. «AKUSHA TRAIL RUN» ибти уличилти абзаназир бутIа­кьяндеш дарес дигутира ба­хъал сабри.
Буралли, Б.Айгубовра Ахъушала районнизивадси сайри. Илини сунела ахIерси район республикала дурабра машгьурбариб, спортлизир диахъубти сунела сархибдешуначил. Ил мушулбашнила шайчирти декIар-декIарти жураби хIясибли Россияла ва дунъяла чемпион, Россияла, дунъяла ва Гиннесла Жузла гIяхIцад заманализив дуцIикIули битIак камбирнила шайчирти рекордунала рекордсмен сайри. Ил «Дагъиста халкьла игит» орденничилра шабагъатлаварибсири. Спортла мастер, цулбала тухтур, дуцIкьяна, тренер сайливан, БяхIямма Айгубовли жамигIятла гIямрулизирра жигарла бутIакьяндеш дирутири. Илини сунела лерилра гIямру халкьла гIяхIдешлис харждариб, ахIерси шилизи аркьуси гьунила дубла азирличирра имцIали галга удатур. Илис дебали дигахъи сай акIубти мер-муса.
Аргъла аги-хIяйчи ва тIабигIятла шуртIрачи хIерхIеили, ил гьар бархIи дуцIикIусири, цалра бархIи убхIебатурли. Ил баркьуди илини шуцIали дус гIеббуциб. ДуцI илала гIямрула бекIлибиубси бутIали ва мягIнали бетаур. Республикализир дурадуркIути лерилра далдуцуназир илини жигарла бутIакьяндеш дирутири.
ХIера, ишди бурхIназиб илала хIурматлис дураберкIибси балбуцра ахъси даражаличиб бетерхур. Илини Ахъушала районнизиб дуцIла спорт гьалабяхI башнилис бикьридешра дариб.
Спортла байрамли илизир бутIакьяндеш дарибти лебталалра уркIила гьав ахъбуциб, челябкьлализирра сагати тренировкаби дирахъес гьуцI ва гъира имцIадариб.
ДуцIла абзанани устадеш лерти спортсментачил къяйли арати гIямру дуркIути, спорт дигути, лерилра дусмала адамтира цалабяхъиб. Улкала декIар-декIарти мер-мусаличибад бакIилри илди абзаначир бутIакьяндеш дарес багьандан. Машгьурси спортсменничила дурхъати гьанбикунани сабри илди лебилра уржахъибти.
ДуцIкьябани Ахъушала жагати мер-муса кункли ахъиб. Илдала гьу­ни кабизурлири ядала ва­цIа­лизибад, жявхIелла мер-му­саличибад, дубурла шарала, къараулбируси къуббала, гьаб-убла мижитла мякьлабад. Абзанала бехI­бихьуд ва ахир биалли детер­хур «Варъала шури» бикIуси бамсриихъуси мерличир. Илди лерилра дуцIкьябани ахъибти мер-мусаличир лаг-катхIел, ца­ца­дехIти къияндешуни лерри. Бу­тIакьянчибас ва гIяхIлас хIя­дур­­дарилри суратуни касахъес ва берка тIем багьес вирути, хасти ме­ранира.
Абзани дурадуркIнилис сиптакарси сайри Ахъушала районнизивадси спортсмен, гьалав нушала газетала бекI редакторли узули калунси ГIябдуряхIман ИсмягIилов. Цалабикибтала гьалав гъайулхъули, илини абзани Ахъушар гьар дус дурадеркIили дирар или багьахъур.
Балбуцла ахирличиб декIар-декIарти гIеркъадешуни хIясибли гьаларти мерани дуцибти спортсменти арцла мухчабачил (даршал азирла цахIнабси фондлизирад) шабагъатлабариб БяхIямма Айгубовла рурсили.
Дунъяличирра хабардерхуси спортсменна хIурматлис дура­дер­кIибти абзанани чемпионничила дурхъати гьанбикуни даимлис калнилис бикьридеш дирули сари. Ил бархIира дуцIкьябани километртицун ахIенрину ихъути, Дагъиста спортла урибси вакил БяхIямма Айгубовла хIурматлис лебилра цабиъни чебаахъиб, илала спортличи диги чула уркIбазирра лерни аргъахъиб.