ГIергъити дусмазиб февральличир даргала районтала ва Дагъиста миллатла му­гIял­­лимтани школаби-ургарти, районти-ургарти олим­пиа­даби, конкурсуни ва да­хъал цархIилти далдуцуни дура­дур­кIули дирар.

Наб дила макьалализиб бурес дигулра Уркухъла дахъал шалубарси лицейла мугIяллимтачила, илдани чула школализи ухIнавхъунси адамла хIурмат-хатир дарес балниличила. Хабарла ХIурхъан Батирайла «АрхIя кIиибил» бикIуси далайлизиб гьанбуршули сай багьадур ванашикунтличила ишкьяйда: Батирай дугьаизурли сай ванашикунтличи, делгIути мухъила сунесра пай баахъес или. ИлхIяйзиб ванашикунтли жаваб гили саби:
«ХIябра бякьиша» или
Цалиини унции гиб,
Итилтаан мухъи гиб.
Батирайла далайлизибти ванашикунтлис гIе­ла­хIе­­булхъан уркухъла лицейла мугIялимтира. Чус хIя­лалдиъ, гIямрулизиб мурталра талихIла берхIи ухаб!
Конкурсла бутIакьянчи сай­лин ну ил школализи вякьун­си­ри февральла 17-личив. Жа­няхI­лизиб гьунибаибти технический хIянчизартани, школала бучIантани, мугIяллимтани наб, гIяхIяйс, кадуцибти берхIиван шалати дяхIли дила уркIи дебали разибариб, чархла гьав ахъбуциб. Лебилра илди адамличи дигиличил, карцIдешличил гьунибаэс хIядурлири. Конкурсличи дарс кабихьес вякьунси нура илдани халаси разидешличил кьабулварира: гьала хили классла кабинет хIядурбарахъиб, дурхIначил тянишварира, цали чебаъла ваяхI – таблица гиб, цали проектор гиб. КъантIли буралли ну илдани гьарра шайчивад гIевуцира ва дила мурад бетаахъур.
Наб лицейла лебилра му­гIял­лимтас халаси баркалла­ багьахъес дигулра, хаслира — директорла заместитель На­бигуллагь Кьурбановлис, дарган мезла мугIяллимти Па­тIи­матлис, Раисатлис, урус мезла мугIяллим Хадижатлис. Ахирличиб хIушаб ца наз­му­ла куплетра пешкешбирулра:
ГIяхIли башаб хIушачи
Разити хабуртачил,
ХIяя, мялхIямдеш, диги
ИмцIадикIаб хIушазир.