Декабрьла 12-ли­чиб Сер­го­къа­ла­ла­ район­низиб рес­­­­­публикала «Дусла учи­тель-2019» конкурсла мер-му­са­­­ хIясибси бутIа шадлихъла аги­-кьяйдализиб абхьиб.

БутIакьянчибачи дугьаизур Сергокъалала районна бекI МяхIяммад ГIямаров:
«АхIерти «Дусла учитель» кон­курсла бутIакьянчиби! Тарих гьанбиркахъули, бурес ди­гулра, нушала районнизиб цаибси школа абхьибсири 1912 ибил дуслизиб, ХIурхъила ши­лизиб. Ил шилизибадцун дурабухъун гIилмуртала 35 доктор ва 72 кандидат. Да­гъиста ССР-ла багьудлуми тIинтIдирнила шайчивси халкьла комиссар ГIялибек Тахо-Годира ил шилизивадси сай. Илкьяйдали нушала леб Мурегала ши, сунезибадра азадли мушулбашнила шайчибси халкьани-ургабси даражала спортла бахъал мастерти дура­бухъунси. Иш­бархIила конкурсла бу­тIа­кьян­чи­бас арадеш, талихI, гьарбизуни дулгулра.
Бурес дигулра Краснопартизанскла школала учительница Насибат ХIяжиевачила, сарира Москвализиб бетерхурси нешла мезла учительтала ургабси лебил Россияла конкурслизир, «Халкьла машгьурдеш» номинациялизир че­дирикибси. ИшбархIила лебилра бутIакьянчибасра халати гьарбизуни диаб!»
Гьарбизуни дулгули, гъайбухъун районна багьудила управлениела начальник Ханум ГIисаева, «Дагъиста дусла учитель-2018» кон­курсла республикала бу­тIа­ли­зир чедирикибси Альбина Аюбова.
Балбуц ибхьнилис хасбарили, концертла программара хIядурбарилри. Районна гIяхIлас бегI гьалаб гьунибаиб дурхIнала искусствола школала бучIанти, «Дила ХIурхъи» делхъличил. Ил­кьяйдали хIербикIути чула пагьмуртачил разибариб­ дурхI­­нала пагьмуртала Юртлизи алавбуцибтани – «Кавказла дурхIни» делхъ чедаахъиб. Шими-ургабси ку­льт­урала-басмриихънила центрла хIянчизарти Мя­хIям­мад Лукьмановли, ХIузай­мат Иб­рагьимовани ва Гьи­даят Мя­хIям­мадовани далуйтира зайдухъахъун.
Илала гIергъи конкурсла «Методический семинар» би­кIу­си цаибси абз бехIбихьиб. Илизир бутIакьянчибани чу­ла санигIятлашалти устадеш, ме­тодикалашалти сагати тя­хIур­ти ва бучIантачилси бу­зе­рила асарчебдеш гьаладирхьу, гьаргти дурсрира дура­дер­кIили дирар. Конкурслизир бутIакьяндеш дирули сари 10 районна вакилтани: Сергокъалала, Буйнакъскла, Хьаргабла, Дахадаевла, Къарабудагъкент­ла, Гумбетовла, Хайдакьла, Лак­ла, Лавашала ва Кулила. Кон­курсла баянтачила кIинайс балахъехIе.

Сергокъалала районна
багьахънибала центр