Гьалабван «Дагъистан» РИА-лизиб республикализиб гъамли бетурхуси «Каспий-2019» бикIуси мажлисличи хIядурдеш бирнила масъултас хасбарибси конференция дураберкIиб.
ГьанбиркахъехIе, ил мажлис нушала республикализиб гьанна верхIнайс дурабуркIуси саби. Ил бехIбирхьуси саби сентябрьла 24-личиб.
Мажлисла директор Рустам ХIямидовли буриб: «Мажлис дурабуркIуси программа 80 процентла балкьаурли саби. Гьанна нушани устадешла дурсри, конференцияби дурадеркIес майдунти хIердирулра. ГIуррара бурасли, багьудила программа «Жагьилти профессионалти» ва «Жагьилти гьабкьяби» бикIути кIел бутIаличи буртIуси саби. Илкьяйда алкIахъути сари бизнес-тренингуни, чучирра бутIакьянчибас чула проектуни гьаладихьес имканбикIути. Илдала дурабад, мажлис дураберкIес 20-цад майдан декIардирути сари. Гьарил бутIакьянчини сунес дигуси тIяхIярли замана беркIес вирар».
БутIакьянчиби чеббиркIути саби бицIахъибси анкета хIясибли. Хаслира пикри бяхIчииуси саби саби-бегIти проектуначи. Анкета биалли, «Россияла жагьилти» АИС-ла сайтличиб бицIахъес вирар.
Буралли, камли ахIен нушала республикализир гьар бархIи дурадуркIути ил журала далдуцуни. Хаслира дигесили бетарули саби илдазир нушала даргантанира жигарла бутIакьяндеш дирни. ХIера, «Каспий-2019» мажлисла директор Р.ХIямидов акIубси сай Сергокъалала районна ГIяймаумахьила шилизив. Сунела дусмачи хIерхIеили, илини республика гьалабяхI башнилизи илцадра мягIничебси пай кабирхьули, узули сай. БахъбикIаб нушала дарганти-ургаб илдигъунти пергер жагьилти. Республикаличи илдигъунти «уркIи изути» адамти лебай, нуша шаласи челябкьла бирниличи дирхес дирехIе.
