ГIямру аркьухIели, гьарилра адам варскайрули сай. Ил имцIали зягIипиркес вехIирхьули, арадеш къулайбирути арадешханабази вашес кьадарбирули саби. ГIергъиси замана гьаман дилара арадеш нукьсанбиркули бирар. Ил багьандан районна больницализи арадеш къулайбиахъес карилхьули рирус.
ХIера, ишдусла апрельла шуличир тяхIуряхъили хъехIрикIес рехIрихьира. Кьаркьала гьунарагарбиуб. Кьаркьа буцIардеш гIяшбирули ахIенри. Ил багьандан наб районна больницала терапияла отделениелизи карихьес кьадарбиуб. Илар рузуси тухтур Муъминат ГIябдусамадовнани черетаахъили ахтардирарира ва ну арарарес къайгъни дехIдихьиб. Ил гьар бархIи нушачи раши, нушала аги-кьяйдаличила хьаррикIи. Муъминат ГIяхIмадовнала, медсестраби: Пирдаузла, Айханумла, Зазабала, Жавгьаратла, Раисатла къайгъначирли, илдани дирути уколтала, кадилзути капельницабала ва лугути дармунтала гIяхIдешли ну сагъкариубли, дила хъалибаргличи чаррухъунра.
ШалгIеббухъунси дурхъаси Рабазан базла ахирличир ну гьатIира больницализи рикира. Илис сабаб биалли, дубрурцули кьаркьала гьунарагарбиъни сабри. Кьаркьа буцIардеш авцIайчибад убяхIбиркули ахIенри, хIила гъяж 180-200-личи абиркулри. Ил багьандан ну инфекционное отделениелизи караркьира. РахъхIи рузули, хIянчила халати устадеш лерси Аминат МяхIяммадовнани итмаданал набчи халаси пикри бяхIчиаиб ва дила изала белгибарили, къулайриахъести тяхIурти далдуциб.
Ишаб бурес дигулра ил отделениелизибти хIянчизартала, чула хIянчиличи чекабизурдешличила, зягIиптачи малхIямли, дугьабилзниличила, отделениелизибси умудешличила, заманаличиб зягIипти кьацIли балхниличила. ЗягIипсилис гIягIнити сари: тухтурла ванаси хIерра, малхIямси гъайра. Илди лерилра лерри Аминат МяхIяммадовнала ва илаб бузути хIянчизартала.
Наб иш макьалализиб халаси баркалла багьахъес дигулра терапияла отделениела заведующая Аминат МяхIяммадовнас. Баркалла багьахъес дигулра илди отделениебазиб адамтала арадешлис къарауйчи кабизурти лебилра медсестрабас.
Медицинала хIянчизарла БархIиличил хIуша уркIи-уркIиларад мубаракдирулрая. ХIушала гьамадли ахIенси бузерилизир чедибдешуни, хъалибарглизиб диги, зягIиптала ургаб хIурмат гьатIира имцIадиубли дигулра. ХIушала байрамличил цIуба халатунала дегIти!
Манзилла дуклумачир
Аркьялра дусми хъярхъли,
ДеркIаба рикIус гIямру
УркIби сагъли, чарх батли.
УркIи бикIул дикIули
Мурадлира дааба,
УркIи биъна диули
ГIямрулира делкъаба.
