Украинализиб бетурхуси хасси балбуцла бутIакьянчи Хайдакьла районна Мажалисла шилизивадси танкабала ротала командир, капитан Руслан Кьурбанов Гъабзадешла орденничил ва Суворовла медальличил шабагъатлавариб.

Ишдусла февраль базличив вяхъибси капитан гьанна реабилитацияличив сай. Муниципалитетла пресс-службала вакилтачил бетерхурси ихтилатлизиб илини Россияла гIярмицунани гъабзадешличил ВатIан балтахъниличила буриб.

«Россия батахъес, илар дузахъути гIядатуни калахъес саби нушала мурад. Бахъал дусмазиб адамтала хIерани дарскадарес ва Россия тIутIубарес Америка къайгъилизиб саби. Дусличир-дус имцIадикIулри илдани алкIахъути сагадешуни, нушала халкьлис гIядатлати ахIенти, хала бегIтала культурализирад ва тарихлизирад дебали декIардулхъути ва наслубала бархбас булъахъути», — буриб илини.

ВягIда хIясибли 5 дус къуллукъбируси Р.Кьурбановла подразделение хасси балбуц бехIбихьибси бархIи Украинализи бархьибсири. Ца дусла ухIнав ил кIел шабагъатличи лайикьикиб.

«Цаибси шабагъат наб бикибсири Изюмлизир Украинала ярагъладарибти цIакьаначил къаршидикибхIели. ИтхIели нушани илдала дахъал техника тIутIударира ва ца офицер ясируцира», — чеимцIабариб илини.

Сунела дявила юлдашуначи дугьаилзули, илкьяйдали гъабзадешличил Россияла танкабала гIяскурти машгьурдиреная или буриб илини.

«Сагъвиубмад ну дила ротализи чарулхъусира. Командир сайливан, ил дила чараагарси чебла саби. Ну мурталра дила юлдашуначи пикриикIулра. Чедибдеш нушагIебли бирниличира вирхулра», — иб Р.Кьурбановли.

«Хасси балбуцлизир бутIакьяндеш дирути бахъал хайдакьланти  пачалихъла шабагъатуначи лайикьбикили саби. Илдачи нушани халаси пахру бирулра. Илдигъунти гIяхIгъубзни лебай, нуша урехиагарли хIердиэс дирехIе. Руслан Кьурбановлисра чIумаси арадеш булгулра. Чедибдешличил жяв-жявли нушала дурхIни хъули чарбухъаб!» — викIи районна бекI ГI.Темирбулатов.