Гьаларти газетала номертазиб ну­ша­ни чуйнара гьан­бушира Дагъиста халкьли тIаш­балтуси ГIиса Идбагла (гI.с.) уличилси Динна Центрлизиб бу­зули гьарилти шими-шагьур­тала жамигIятли халаси хIяра­кат бирниличила.

Ил дебали халаси кьадрила ва керила хIянчира саби. Адамтани иличибли ЧевяхIси Кьуд­ратла ВегIличи дигицун ахIенну чедиахъути, чула саби-ургарти гьалмагъдешра уржибдешра сари.
Даргала районтани, шимани белгиси пай кабирхьули саби Центрлизирти хIянчи дирнилизи. Иш яргализибра март базличибад бехIбихьили апрельла бехIбихьудличи бикайчи илаб даргантала билхъа бетерхур. Буралли, ил мекелли халаси билхъа сабри, сенахIенну ил авцIалицад бархIи бухъянбитIун.
Ахъушала районна шимала жамигIятла лацла устнани мижитла гьалабси бяхIла луцри делши тIашдатурли барибси ха­ласи хIянчи чебаэс вирар. Хаслира гьанбушес вирар Ахъушала, ТIебекмахьила, ХIям­шимала ва цархIилтира ши­мала адамти. УркIила дигиличил илдани бузери гIягIниси тяхIярли гьунчибикахъес мягI­ни­чебси пай кабихьиб. Дигесли саби, ил гIяхIбаркьла бар­кьудилизи дила шантира иш­тяхIличил ахъни. Баркалла биаб чус!
«Даширая цахIнаб тIаш­бал­техIену Динна Центр» ибси жиличил лебилра жамигIятли цабалги барх бируси хIянчи, гьайгьайрагу, лебтасалра гIяхI­си гIибрат саби, ил Аллагь (а.т.) багьандансили биаб. Аллагь чучи разили калаб. Амин.