Ишди бурхIназиб Хайдакьла районнизиб «Шиниша километрти» балбуцла дазур­ба­зиб халаси ва дебали пайдаласи билхъа дураберкIиб. Ил балбуцлис сиптакардеш да­риб­си Дагъиста БекI Владимир Васильев сайри.

Бал­буц республикала лерилра районтала ва шагьуртала халкьли гIеббуциб.
Хайдакьла районна 16 шилизиб хIербирути 2 азир адамли балбуцличир бутIакьяндеш дариб. Мажалис-Ма­медкъала федеральный гьунила 2,5 километрла кIел­ра шайчи 1500-личир имцIали хурла мархIяби удатур.
Билхъаличир дарибти хIянчиличила искусствобала школализи башути дурхI­на­ни кадяхъибти суратунала конкурсра бетерхур. БиштIатани ил­ди шиниша тIабигIятличила сурату­ни билхъаличиб бузути адамтачи хIер­­би­кIули дирутири. Районна бекI ГIя­лим Те­мир­­бу­латовла сипта хIясибли дура­бер­кIиб­сири ил кон­курс.
Бурес гIягIнибиркур, Хайдакьлизиб дурабуркIуси ил балбуцличи Светла­на Горева ракIили лерри. Светлана Го­рева «Вице-Мисс Москвы-1998», «Пер­вая Вице-Мисс России-2000», «Кра­са России-2003», «Мисс Мира»-ла ва «Мисс Вселенная» балбуцла ахирла­си бутIализи дурарухъунси исбагьи, цар­хIил дугьбани буралли, дунъяличирра бегI­лара жагати хьунул адамтазирад ца сари. Илини биштIатала суратуни хIердариб ва ца сурат кабяхъибси кIапIилизи ванати, хайдакьлантас гIяхI­деш булгути дугьби делкIун. ГIур биалли Светлана Горевалира ГIялим Темирбулатовлира галгуби удалтуси билхъализир бутIакьяндеш дариб. ХIера, илкьяйдали дунъяличирра жагаси хьунул адамли Хайдакь жагабарес кьасбариб.
«Нуша лебталалра къайгъначибли ца-чумал дусли ишаб хурла галгубала дякь бетарар, — викIар ахирличив районна бекI. — Челябкьлализиб кьасбирисра тяп ишдигъунти дякьани (аллеяби) районна шимазирра диахъес, кьакьурбазир, школабала ва биштIатала унхърала мякьлар. Халаси баркалла хIушаб ишбархIи барибси хIянчилис».