РиштIахIели наб де­бали дигахъусири бур­ханир чатIни ду­чIу­ти ва гьаргалар лагьни ца­ла­диркути манзилти. Ил­дачи хIеррикIухIели, дила уркIи разидешла хIяланазиб булхъусири ва творчествола урунжлис бехIбихьуд ка­би­хьибти белкIани цала­дир­хъес иштяхI алкIусири.

Тяп илди ал­жанала арцантала цала­би­куниван дилзан мур­талра наб пагьмучев адам сабабли ве­таурли дурадуркIути шад­ли­хъунира. Илдигъунти далду­цуначир дирар адам­тала гьал­магъдешла ва юл­даш­деш­ла бархбасуни ур­жа­хъути, па­гьмуртала урунжуни гьар­г­дирути, сагати произ­ве­де­ниебас хьулчни кадирхьути, белгиси ца адамла гIямрула ва творчествола лямцI бахъла пикрила дайлаб бетаруси.
Иш гьакIлис даргантачи ва Дубуртала Улкала бахъал адамтачи сунела малхIямси уркIила ва сахаватти някъбала кумекличил малхIямдешла гулвавнани варакьбарибси дякь кабихьибси Бибалаева ГIяйшат Кьурбановналичила сари гъай. Илис хасбарибси балбуцличир, гьайгьай, дубурла зярхIти вавнала тIемра, поэзияла аязси гьавра сахаватлири. Миллатла байрамличи яра гъамсила сяхIбатличи кьяйда жагали бегIбиубли бахъал адамти цалабикилри пагьмучерси поэтличил ва къайгъичерси тухтурличил барх разидеш бутIес или.
ХIера, ишдусла апрельла 7-личиб ДГУ-ла филологияла факультетла заллизи ца­ла­би­кили поэзия дигантицунра ахIи, медицинала хIян­чи­зар­ти­ра лебри. Илди кIи­бе­хIелра уржахъили ца авидлизи цалабяхъибси Дахадаевла районна Трисанчила шилизирадси ГIяйшат Кьурбановна сарри. «Юлдашунала ургар» ибси шадлихъла балбуц сабри ил бархIи ГI.Бибалаева акIубси бархIилис ва илала авэсил жуз дурабухънилис хасбарибси.
Поэт, прозаик, публицист, РФ-ла писательтала ва журналистунала союзунала член, СССР-ла медицинала рурибси хIянчизар ГIяйшат Кьурбановна 1974 ибил дусличирадли ру­зуси сари МяхIячкъалала дурхI­нала кIиибил поликлиникализир старшая медсестрали. Сунела санигIят ахъси даражаличиб бузахъуси дубурлан хьунул адамли назмурти, хабурти, макьалаби лукIесра замана бургули сари. Пагьму дигIянбарес вируси ахIен бикIаргу халкьлизиб. Гьайгьай, ГIяйшат Бибалаевала пагьмули адамтала уркIбази гьамадли гьуни баргиб. Илала назмурти далайчибани шадлихъуначир гьайбатли зайдикIахъули сари, халаси иштяхIличил илала цархIилти белкIанира адамтани дучIули сари. СенахIенну мурхьси мягIнала белкI биштIа-халатас изайс дарманван хIяжатси саби.
ГI.Бибалаевани медучилищелизиб багьуди касили гIергъи, Ростовла чебяхIси даражала партшкола хъараахъур, гIур Москвала юридический университет таманаиб.
Илала назмуртала, хабур­тала, очеркунала авал жуз ду­радухъи сари. Дахъал са­ри ГIяйшат Кьурбановнани иш­бар­хIила далагардешуначила, челукьутачила ва бархьагардешуначила лукIути макьалабира. Ил лукIуси сари урус ва дарган мезаначил.
Балбуц бехIбихьиб Бибалаевала гIямруличила къантIти баянтала видеоролик­личил. ГIур зайдухъун Дагъиста жа­ми­гIят­ла «Историяла ва культурала давла» бикIуси цахI­набикла руководитель Перзият Кьурбановала, Мя­хIяч­къалала кIиибил поликлиникала бекI тухтур Муслимат ХIяммаевала, ДГУ-ла юридический отделла начальник МяхIяммад ХIясановла, ДР-ла писательтала Союзла даргала секцияла руководитель, ДГУ-ла профессор Муса БяхIяммадовла, ДР-ла кинематографияла Союзла председатель МяхIяммад Сулайбановла, Дахадаевла ва Хайдакьла районтала вакилтала, журналистунала, поэтунала, писательтала ва цархIилти гъайбухъунтала мубаракла дугьби. Лебтанилра ахъси кьимат лугулри юбилярла бугаси пагьмулис, сахаватси уркIилис ва бамсриагарси бузерилис.
«Дагъиста гIямру» газетала хIянчизар ХIяжи Мирзаевли ГIяйшат Кьурбановнас «Чебла ва хIурмат» бикIуси орден шабагъатлабариб. Ил къулбасбарибси сабри цахIнабси Россияла дергъла чулахъунала ва дявила кабизла жамигIятла организацияла председатель, генерал-лейтенант В.Еф­ре­мов­ли.
Даргала далуйтала ва дел­хъла агурбала жагати макьамти зайдулхъулри урга-ур­гади. Заллизибтас дебали гIяхI­дизур ДР-ла халкьла гIяр­­тистуни Хадижат Иб­ра­гьи­мовала ва ЦIибац ГIя­ли­ши­ховала, ДР-ла бурибти гIяртисткаби Бурлият Мя­хIям­мадовала, СултIанат Шигьвалиевала, Хазинат Камаловала, ГIяшура ХIясановала ва цархIилтала далуйти.
Балбуц ахирличи бирку­хIе­ли, полицияла генерал ГIяй­шат Кьурбановала мура узи МуртазагIяли Мур­та­за­гIя­лиев­ли ва поэтессала рурси, Трисанчила школала директор Алена ГIяб­дул­лаевани цалаби­кибтас халаси баркалла багьахъур.
Р.ХIямзатовла уличилси республикала Миллатла библиотекала краеведческий отделла хIянчизар Салимат ХIяжиевани «ХIуша-ургар хIеррирулра» ибси ГI.Бибалаевас хасбарибси жузала выставка балкьаахънира дигесири. Илар лерри ГIяйшат Кьурбановнала жузи, иличила белкIани ва Дахадаевла районнизибадти автортала жузи.
Шадлихъ хъараахъур Трисанчили арикьурси хIурматла хьунул адамли давлачебси кьумурличи цалабикибти жибарниличил. ГIе, ГI.Бибалаевала бегIлара дигуси хасият саби адамтас дуцIар-дуцIарти чудни ва цархIилти дубурлантас дигутили детаурти хурегуначил сахаватли гIяхIялдеш дирни.
Ахирличиб бурес дигулра, хIугъунти верхIцIали гIяхI­гъа­б­зази бухъести дубурлан хьу­нул адамти гьатIира бахъба­аб, хIур­матла ГIяйшат Кьур­ба­нов­на. Ди­ла кьаламла рузис ишди тугъира пешкешди­рул­ра:
Адамдешла ахъанай
Ахъири къардхIерухъи,
ЯхI-ламусла капарай
Ганздирид сабурличил.

ЧевяхIсини пагьмула
ЗурхIяб хьурабарибси,
Кьисматли малхIямдешла
Урунж минабарибси.

ГIямрули пасихIдешла
Хьулчни чIумадарибси,
Заманала имтихIян
Умутличил дуцибси.

Кулпетлис ва тухумлис
Савлила берхIигъуна,
Шантас ва дурашантас
Кьиблала уригъуна.

Тах шагьарла биштIатас
Сабабла гьайкаргъуна,
Къиянтази бикибти
Хъарихъул къалагъуна.

Тухтурла малхIям някъли
ЗягIипти сагъбирули,
Ратаби хIу арали
Цугли даршлим вецIал дус.

ШягIирла белкIанани
ГIялам хIулбуркIахъули,
Калаби хIу, ахIерси,
Шишимъала агарли.