Ишди бурхIназир Ярагъла­да­рибти ЦIакьа­нази къул­лукъбарахъес жагьилти ар­бикниличила ба­гьахъурхIели, гьарилла хъу­ли, нешанала, рузбала, рурсбала уркI­бази, чус ахIерти мурул адам­тачила паргъатагардеш хьура­биуб.

Къиянси замана улкалис бекI­деш­ дируси Президент В.Путин гIевурцуси МяхIячкъалала бегIла халаси майдайчиб дураберкIибси балбуцличирад циила уркIи паргъатбиубли чарриубсири. УркIи паргъатбиуб, сенахIенну Дагъистанна халкьли уркIи-уркIилавад улкала БекI гIевурцулри. Улкализир гъузгъалдидеш адикьес дигутани, гьар журала телеграм-каналтазиб бюджетла алапаби кайсути балбуцличи хъарбаркь таманбарес бакIибти саби или бурули биалра, цалабикибтала дяхIличи хIеррикIухIели, гужли бакIахъибтачи илди, гьеч мешули ахIенри. Балбуцла программа таманбиубхIелира майдан бицIили адамти лебалри. Илдас, чузибад лябкьуси барили, улкализиб паргъатдеш калахъес дигулри.
Телевизорличи хIеррикIес рахлира замана бургули хIерирус, Крымлизибси гуми баргберднила хабарли, лерилра ил бархIила дирути калахъун. Европала политикализибти, сегъуналра бяркъ агарти, адамтала дурутани гьатIира тамашариахъубра. Россияла бегIлара гъамти унрубили сабти, Эстонияла дурала улкначилти бархбасунала министр Рейнслаули, Крымла гуми баргбердахъниличил Украинала бургъанти мубаракбирули сай. Польшала сеймла депутат Бедруновла уркIи, гуми баргберднили ряхIятбиахъубли саби. Илдигъунти унрубани сегъуна челябкьла лебхули дунъяличи? Гуми баргбердибхIели разибиубти гIурра чебиахъулри телевизорлизиб. Марли, илдани, цархIиллис вайбиубхIели ра­зивиубсилис Аллагьли гIяхIдеш хIебирниличила балули хIебургар. Дурхъати жузазиб, Аллагьла Каламлизиб унраличил вархвалги хIериахъес, цархIиллис вайдеш хIебирахъес азирти дусми гьалаб бурили лебси саби.
21 ибил даршдуслизиб, космослизи ракетаби дур­хьути, компьютерти, телефонти, машинаби, поездуни, самолётуни дарес устадеш лебти адамти даршули хIербиэс хIебирни тамаша ахIену? Бахъал адамтани дунъя бархьли бузахъес багьандан, ЧевяхIсини дархьибти хъарбаркьуначила балули ахIен, Дурхъати Табтурти дучIули ахIен, ЧявяхIсилизибад урухкIули ахIен, халати къуллукъуначиб бузути, чула пикрумазирад ва баркьудлумазирад дахъал секIал дурадулхъути адамтира бархли, дунъяличи гIяхIдеш хьурабиахъес пикрибикIули ахIен.
Баягъи В.Путин гIевурцуси балбуцличиб гъайбухъунтани, Америка гIяйиблизи хIебуциб, белики, илкьяйда бархьси биэсра асубирар, амма дила пикрили, США гъудурхIебируси биалри Россияра, Украинара, Европала цархIилти улкнира чула ургар далкадирки. Россияла Президентла тIалабуни детерхахъес къиянти ахIен; НАТО-лизибад Россиялис урехи хIебиахъес, Украина чичилра хъархIерагарсили калахъес, урусла миллатла адамти чула уркIилис дигуливан Россияличил бархбяхъес. Илди тIалабуни дархьтили чедиулра.Сегъунти гъайличил Америкали биргIябургули биалра Европара балу-балули чус саби зарултани биркьули саби, Россияличил даршудешра балгундешра булъули, санкциябачи хъарахъили саби.
Бахъ гIяхIсири Америкара дунъяла халкь гъуз­гъалдихIебирули, сунела мерличиб бууси биалри. Д.Лондон, нуни лерилра-сера жузи делчIунси писатель сай. Амма илини белкIунси ца секIайчил ну кьабулли ахIенра, «ДяхIила рурси» бикIуси илала хабарлизиб леб, Англияла миллатла адамти лебтачибра духути ва цIакьти саби или белкIи. ЧебяхIти писательтира хатIабиркули бирар, ЧевяхIсила Дурхъати Жузи сари хатIа агарти. Илди хьулчили дуцили хIербиэс гIягIнили саби дунъяла адамтас.
Даршдусмала тарихлизиб Россиялара Украиналара халкь цабехI саби. Россиялаван илдачи чилалра уркIи хIейзур.