Хайдакьла районна ле­рил­ра культурала учреж­де­­ниебазир Россияла бай­­рахъла БархIилис хасдарибти дал­ду­цуни дурадеркIиб. Илдала да­зурбазир муниципалитетла хIян­чи­зар­тани жагьилтачил багьудлуми им­цIадирахъути ихтилатуни, ба­гьахъ­ни­ба­ла сягIятуни, выставкаби дурадеркIиб.

Байрамличи хIядурбикIули, илдани районна ва шимала культурала Центртачи ва библиотекабачи Россияла байрахъуни, ранг-рангла пушягIуни, ВатIайчи диги адилкьути дугьбачилти баннерти даршилри.
Илкьяйдали, культурала учреждениебазир, Россияла тарихличила бурути жузачилти ва энциклопедиебачилти выставкабира далкьаахъурлири.
Иличи че, культурала хIянчизартани мерлабти жагьилтачил «Один флаг – одна Россия», «Символика России», «Мы гордимся нашим флагом» бикIути багьахънибала сягIятуни дурадеркIиб. Илдала дазурбазир сиптакартани Россияла байрахъла тарихличила буриб.
Балбуц бехIбирхьули гъайбухъунти библиотекабала хIянчизартани гьанбушиб, Россияла байрахъла БархIи Россиялизирти байрумтазибад — «жагьси» саби или. Ил кабизахъурсири 1991 ибил дусла августла 22-личиб. ИтхIели миршра, кьякьра дарибси хIунтIена чIянкIила бутIа барсбарили, хIябал рангличилси Россияла байрахъ Правительствола Юртла чедиб ахъбуцибсири.
«Лерилра улкнала чула лишанти (байрахъ, герб, гимн) лерти сари. Нушала улкала лишантани илала тарихла гьунила хасдешуни ва цархIилти улкназибад декIардеш чедиахъути сари.
Масала, Герб ва Байрахъ акIахъубти сари кадизахъурти кьяркьти тяхIуртачил ва цагъунти ишарабачил, чулира жагадеш, бархьдеш, вайдешличибад гIяхIдешла чедибдеш чедиахъути. Нушани балуливан, байрахъла ранглара чула мягIна лебси саби: цIуба рангла – даршудеш, инсап-хIяяла умудеш; хьанцIала – мардеш ва бархьдеш, хIун­тIенала – цIа, гъабзадеш ва ВатIан багьандан кертIибти хIи», — буриб илдани.
Библиотекала хIянчизартани хIябал рангла байрахъ акIахъниличилара буриб. Гьаланачи илди рангли чебиахъуси мягIна декIарсири. Замана арбякьи гIергъи, мягIна барсбиубли хьалли, байрахъла ранг лертиван кали сари.
Районна кумекчибала кьукьнанира дал­дуцуначир жигарла бутIакьяндеш дариб. Чедибдешла Парклизиб хIябал рангличилси халаси чIянкIи тIинтIбариб, сабира россиялантала пахрули бетаурси.
Хайдакьла районна
администрацияла пресс-служба