Хайдакьла районна администрациялизиб кIел хъалибарг бахъхIи хъай­чиб хIербирнилис «Дигайлис ва мар­дешлис» ибти медальтачил ша­ба­гъатлабарнила балбуц бетерхур. Ил бархIи байрам бирнила гIядат акIа­хъубхIейчибад халаси замана би­кили ахIен. Медальти дедлугути са­ри — халкь-ургаб хIур­мат­чебти, ди­гичебти, 25 дус ва гIур­рара им­цIа­ли барх хIербирути хъа­ли­бар­гу­нас.

Гьанна илдигъунти медальтачи лайикьбикиб: Юсуп ва Сухминат МуртузагIялиевхъали, сабира Бар­шамайла шилизиб хIербирути. Ил­ди цаличил ца гьанна 41 дус хIер­бирули саби; Мажалисла шили­зи­бадти, 40 дус барх хIер­бирути, ГIя­либек ва Наталья ГIя­ли­бе­ков­хъа­ли.
Балбуцла башрилизиб ГI.Темир­бу­латовли гьанбушиб, хъалибаргла бе­кIахъудила гIядатуни ахъси дара­жа­личир дихIути шабагъатбирнила балбуц районнизиб гьар дус дура­буркI­ниличила.
«ХIуша лебтасалра гIибратли детарулира. ЧIумаси арадеш булгулра. Хъалибарглизиб талихI им­цIа­бикIаб. ХIушала лерилра пик­ру­ми-кьасани мурталра детурхаб», — викIи ил.
Балбуцла ахирлизиб, илди хъалибаргунани районна администрациялис, бузерила ва социальный бяхIчибизлизиб гьалабяхI башнила шайчибси Министерстволис ва халкьла бекIахъудила къуллукъуни гIердурцуси Управлениелис баркалла багьахъур.
«Хайдакьлизиб бахъал леб илгъуна шабагъатличи лайикьбикести адамти. Илди сабигу нушала районна давла. Халаси баркалла хIушаб, илдигъунти хъалибаргуначи пикри бяхIчииънилис!» — буриб илдани.