Апрельла 21-личиб муниципалитетунала цалабяхъунала бургачил бетерхурси гьунибаъниличиб ДР-ла БекI Сергей Меликовли гIергъиси замана районтазир адамтала гIярзъала камдиъни чебиули саби или багьахъур.
Бузерилис баркалла балахъули, регионна БекIли ишдуслизиб, къуллукъуни тамандирухIели, декIарбухъунти республикала муниципалитетунала цалабяхъунала бургас пачалихъла шабагъатунира дедиб. Илди-ургав леври «Лавашала район» МР-ла бекI Дабишев Шамил МяхIяммадовичра.
Гьунибаъниличир бутIакьяндеш дариб «ДР-ла муниципалитетунала цалабяхъла Совет»-ла Правление Ассоциацияла председатель, Хайдакьла районна бекI ГI.Темирбулатовлира.
Гьаланачи ДР-ла БекI С.Меликовли Ассоциацияла ва илала председательла хIянчи кьиматладариб.
«Мерличиб чули чус гьуни чебиахъути органти гьаладяхI дашнилизиб бегIлара мягIничебсили бетарули саби ДР-ла муниципалитетунала цалабяхъла Совет», — викIи ил.
Заседаниела дазурбазир регионна ва муниципалитетунала органтала шагьуртала ва шимала халкьличилси бархбас, чедихьибти санкциябала шуртIразиб регионна экономика гьалабяхI арбукни ва цархIилтира масъултира хIердариб.
«Улкала Президентли бурули саби РФ-ла чедибдеш регионтазиб саби или. Республикала биалли — муниципалитетуназиб. СенахIенну, халкьличи дегIлара гъамтили детарули сари мерличиб чули чус гьуни чебиахъути органти. ЖамигIятла бузерила ва гIямрула шуртIри гIяхIдулхъахънила, шагьурти ва шими гьаладяхI ардукнила ва мер-муса къулайдарнила шайчирти шуртIри дузахънила хIянчи хIушачир сари», — викIи, муниципалитетунала бургачи дугьаизурси, ДР-ла БекI С.Меликов.
Иличи че, заседаниеличир муниципалитетунала мер-мусаличир социальный бяхIчибизлашал ва экономикалашал далдуцуни гIямрулизир детурхахънила, халаси ва биштIаси предпринимательствоби гIердуцнила шайчибра ихтилат бетаур.
Украинализиб бетурхуси хасси балбуцличила гъайикIули, регионна руководительли цIакьбарили буриб, республикала хIукуматла масъала саби алхунти бургъантала гъамти хIерудилиуб бихIни, илкьяйдали илдас арцличилра кумек гIеббиахъни. Ил багьандан регионна БекIли хасси Фондра акIахъубли саби.
