Россияла ректортала Союзли Украинализиб ду­ра­буркIуси хасси журала балбуц дугьабизла кагъарличил гIеббуциб. Илизи белкIи саби: «Ишди бурхIназир нушала улка ва гIярмия, чулира нушала паргъатдеш мяхIкамбирути, гIердуцес чараагарли гIягIнили саби, нушала Президент гIевуцес, суненира, биэс асубирар, сунела гIямрулизибра бегIлара къиянси хIукму дурасибси, къиянси, амма дебали мягIничебси хIукму».

Лебил улкала вузанала ректортани дугьабиз къулбасбариб, сунезира белкIунси:
«ХIурматла дархкьяби!
Нушала хIулбала гьалар, Россияла гьарил гражданин паргъатагарвирути анцIбукьуни кадиркули сари. Ил Россияла хIукму саби – гехIел дус духъяндитIунти Украиналара Донбасслара ургарти къаршидешуни тамандиахъес, Украинализирти дявилати вяшатIала ва миллатчидеш агардарахъес ва иличирли нушани нуша халабикIуси урехилизирад мяхIкамдарес.
Нушани, Россияла ректортала корпусли, дусмадли Россияла-Ук­раинала ургарти гIилму-багьудилати барх­басуни гьаладяхI дашахъулри ва чIу­ма­дикIахъулри. Нушала дархти хIялумцIлабани ара­гIеб дунъяла гIилмулизиб халаси пай биахъуб, ил ба­гьандан Донбассла дахъал дусмаласи мусибат нушала уркIбазиб изайчил ва кьутIкьудешличил гIеб-гIебалгьули саби.
Ишди бурхIназиб нушала улка, паргъатдеш мяхIкамбируси гIярмия, гIеббуцес, биэс асубирар, сунела гIямрулизибра бегIлара къиянси хIукму дурасибси — къиянси, амма дебали гIягIниси хIукму — нушала Президент гIевуцес чараагарли гIягIнили саби.
Илкьяйда мягIничебси саби нушала бекIли­биуб­сигъуна чеблаличилара хъумхIертни — къяббердни агарли багьуди лугнила хIяракат даимбарни, жагьилтазир ВатIайчи диги ва илдазиб ВатIайс кумекличи дурабухъахъес гъира адикьни.
Университетуни лерилра замунтазир пачалихъла хъарихъли дирутири. Нушала бекIлибиубси мурад Россиялис къуллукъбарни ва илала адамтала цIакь халабикIахъни саби. Хаслира гьанна, экономикалати ва багьахънибалати гьужумтазиб, нушаб бирхаудичебдеш ва цIакь чедаахъес гIягIнибиркур, хайричерли Президент-алав чукурдиэс, вегIла мисалличибли жагьилтазир гIяхIдешличи хьул ва гIякьлу чедибиркниличи бирхауди алкIахъули ва гъамси заманализиб даршудеш алкIниличи бирхауди абилкьули.
ЦахIнарли нуша – дебали халаси цIакьра!»
Дагъистанна пачалихъла университетла ректор МуртазагIяли Рабадановли бурни хIясибли, акIубти гьамадти ахIенти аги-кьяйдали университетуни уржахъни тIалаббирули саби.
«Украинализибадти бархкьябачил нушала гьар мурталра уржибти гIилму-багьудила бархбасуни дирутири, цали ца мяхIкамдирутири. Баягъи ил багьандан, дугьабизлизибра гьанбушиливан, «Донбассла дахъал дусмала мусибат нушала уркIбазиб изайчил ва кьутIкьудешличил гIеб-гIебалгьули саби». Нушаб чебяхIси даражала багьуди, бирхаудичебдеш, преподавательти ва студентуни-ургар цали цала иргънила ва цалис цали кумекбирнила гIядатуни ахъли дихIни чараагарси саби», — викIи М.Рабаданов.
Илала гъай хIясибли, ректортала союзли пикрибарили саби республикала, Россияла ва дунъяла гIилму-багьудилизир университетунала гIядатуни калахъес ва гьаладяхI дашахъес.
«Нушала вузлизиб декIар-де­кIарти улкназибадт­и студентуни леб, чусра нушани гьар шайчибад кумек­бирути. Нуша гьаннара хIя­дурлира, гIягI­нидеш акIалли, дурала улкназибад чар­биубти студентуни кьабул­барес, илкьяйда— Украина­ли­зибад гьаббухъунти студентунира», — чебатур ДГУ-ла ректорли.