Гьалабван Мя­хIяч­къа­­­лализибси ХI.ЦIа­­­да­сала ули­чил­си КIа­рахъа­ла музы­ка­ла-дра­мала театрлизиб ду­ра­­бер­кIиб­с­и республикала «Халкь бахъал — улка ца» ибси кон­курс­ли­зир бутIакьяндеш да­риб­си Хай­дакьла районна куль­ту­ра­ла хIянчизартала твор­чес­кий кол­лек­тив цаибил мер­личи лай­икь­би­киб.

Республикала 20 муници­па­литет­лизирадти 44 творческий коллективли конкурсла ахирласи бутIализир бутIакьяндеш дарибтири. Балбуцла бехIбихьудличир дурадеркIибти абзаначир илди че­дидикибтири. Илди-ургаб лебри Мажалисла культурала Центрла хIянчизарти ва Россияла халкьанала гьар-урла гIядатунала культурала «Кайтаги» Центрла специалистуни. Илдани декIар-декIарти номинациябазир 3 номер чедаахъиб.
«Миллатла майдунти» ибси номинациялизиб бегIлара гьарбизурсили бетаур «Хайдакьлантала миллатла майдан» ибси номер. Илаб «Кайтаги» этноцентрла шайзибадли хIербикIутас ва судьябала коллегиялис гьалабихьилри арбякьунси даршдуслихълизиб хIербирули калунти хайдакьлантала гIямруличила дурусли баянти чедиахъуси сурат.
Лебил дунъяличи машгьурдиубти Хайдакьла някьишличил жагабарибти декIар-декIарти гIягIниахълумани ва адамтани гьар-урла манзилтазир чула хъулразир пайдаладирули калунти ваяхIли – гажинтани, урцуйзирадли дарибти къугъати някьишличилти тIалхIянали, декIар-декIарти цIедешли дицIибти къугъали далкьаахъурти чIупрани цалабикибти тамашабирахъулри. ИмцIали адамтани пикри бяхIчииулри Хайдакьла хьунул адамтала някъла устадешла бикьрили бетаурси чирхлаличи, жагьси нешли гардбируси сириличи…
Хайдакьлантала гIяртистлати устадеш чедаахъни ва тарихла бяхIяни ункъли дални хIер­бикIутанира жюрилира хIясиб­хIе­да­рили кахIелун. Ил номинациялизиб «Кайтаги» бикIуси этноцентрла творческий коллектив цаибил мерличи лайикьбикиб ва грамотара арцла шабагъатра дедиб.
Хайдакьла районна бекI ГIялим Темир­бу­латовли этноцентрла специалистуни кон­курсличиб чедибикниличил мубаракба­риб: «Культура мяхIкамбирули, хала бегI­та­ла гIядатуни мицIирдирули, нушани че­алкIуси наслу гьар-урла гIядатунала хIур­мат­би­ра­хъес бурсибирулра. Илкьяйдали челябкьла­ли­зир нушала халкьла гIядатунира культура­ра даимдирнилизир дузехIе. ГIергъиси за­мана ил масъалаличи халаси пикри бяхI­чи­иулира саби. Гьарил районни илдигъунти далдуцуназир бутIакьяндеш дирес ва чула рухIлати-бекIахъудилати кабизуни гьа­ладихьес бирар. Дигеси саби нушала куль­турала хIянчизартани хайдакьлантала гIя­датуначила ва устадешличила кагибти баянти гьаладихьнира. УркIи-уркIилабадли мубаракбирулра конкурсличиб чедибикибти ва илдас гьаннала гIергъира гIямрулизир талихI ва арадеш, творчестволизир гьарбизуни диубли дигулра».