Нушани балуливан, октябрьла 1 гьести гIямрула ­адамтала бархIилизи халбируси саби. Ил бархIи кабизахъурхIейчирад 31 дус диркули сари. Нушала хала бегIти, унра-хунра, гъамти ил бархIи мубаракбарес ва илдас замана декIарбарес нушала ­чебла саби. Лебил дунъяличирван, нушала республикализирра ил бархIилис хасдарибти концертуни ва мажлисуни дурадуркIули дирар.

ГIямру тамашала секIал сари. Нуша лерилра ­духънакадиутира, ил гIямалагарси баянни бетаурли саби. Ил багьандан, духънадаибхIели, нушачил секьяйда вяшбикIули дигахъирал, ­илкьяйда ­нушара диэс гIягIниси саби. Нушала ­республикализирти бухъна ­адамти хIербиахъес хасдарибти Юртаназиб дурхIни агарти, яра ­чилра ­кумекбареси агарли калунти бахъал гьести гIямрула адамти ­къаршибиркули саби. Илдачила хъумхIертурли, ­камси-биалра ­разидеш бухънабала уркIбази хьурабарес ­дузули лер ­саби-гIяхIъулатала кьукьни. Илдас нушанира дирусигъуна ­кумекбирес гIягIниси саби.
Халабетаибти адамтачи пикри бяхIчииэс, диги дакIудирес, илди нушаб гIягIнили биъни чебиахъес ва хIурматбирес, ил бархIицун ахIенну, мурталра хIяжатсигу. Гьести гIямрула адамтас хасбарибси бархIи, чедир гьандушибти баянти гьандиркахънилис сабабли бетарули саби.
Пикрибараягу, сецад разиси ва шадси бирарал халабетаибти адамти лебси хъали. ГIямру деркIили, кьисматла лерил шуртIри чIямдарибти, дагьрили бицIибти илданиван чили насихIят ва гIякьлула гъай дурес вирара нушази. Хала бегIти нушала давла саби.
Мисаллис, дила хала нешличила бурасли, ванаси хIерли хIеррикIуси ва нушачи хIулруркIуси хала неш чераасли дила хIулби ­нургъбани дирцIур. ­Нушачи гIягIнихIерикес ил ­мурталра ­къайгъилизир рирар. Амма илис ­кумекбирес нушаб халаси ­разидеш саби.
Хала неш, ­мубаракрирулри лябкьуси байрамличил. ХIу ­нушаб дебали цIакьли дигахъури. Ил секIал хIуни хъуммартид. ­Калунти гIямрулизир нуша хIед хъарихъли ­детарутира. Илкьяйда дигили ва малхIямдешли ламрикIули, нуша хIу ­лерниличи разидирахъули, арадешличил 100 дусла гIямру деркIаби хIуни.
Илкьяйда, мубаракбарес ­дигулра ­лебил дунъяла гьес­ти гIямрула адамти. Къаркъаван ­чIума­­си ­арадешличил, дурхIнала ­дигили кIапIдуцили, ­арати ва рази­ти гIямру деркIабая.